Орон нутгийн цагдаагийн байгууллагын дөрвөн албан хаагч 13 настай охиныг хүчиндсэн байж болзошгүй гэх мэдээлэл олны анхаарлыг татаж байна. Цагдаагийн ерөнхий газраас өнөөдөр /2024.04.04/ энэ асуудлаар мэдээлэл хийв.
ЦЕГ-ын Дотоод хяналт, аюулгүй байдлын газрын дарга Н.Мишигдорж, "Сүүлийн үед цагдаагийн байгууллагын нэр бүхий алба хаагчидтай холбоотой мэдээлэл гарсан. Цагдаагийн байгууллагын Дотоод хяналт, аюулгүй байдлын газар нь хараат бус үйл ажиллагаа явуулдаг. Тус газраас цагдаагийн нэр бүхий алба хаагчид насанд хүрээгүй хүнтэй бэлгийн харьцаанд орсон байж болзошгүй гэдэг мэдээллийг өөрсдийн хяналт шалгалтаараа илрүүлж, холбогдох албаны шалгалтыг явуулсан. Гэмт хэргийн шинжтэй байж болзошгүй гэж Мөрдөн байцаах албаны тусгай субъектийн гэмт хэрэг үйлдсэн мөрдөн шалгах хэлтэст харьяаллын дагуу шилжүүлэн, мөрдөн шалгах ажиллагаа явагдаж байна.
Дээрх нэр бүхий дөрвөн алба хаагчийг одоогоор албанаас чөлөөлж, албан үүргийг нь түр түдгэлзүүлсэн. Цахим орчинд нийтлэгдсэн мэдээллээс харахад цагдаагийн байгууллага алба хаагчдаа үнэнч шударгаар шалгаж чадах уу гэсэн асуулга явж байна лээ. Эрүүгийн хэрэг хянан шийдвэрлэх тухай хуульд заасан “Гэмт хэрэг үйлдсэн хүн, хуулийн этгээдийг бүрэн илрүүлж, гэм буруутай этгээдэд ялыг шударгаар оногдуулах, гэм буруугүй хэнийг ч гэм буруутайд тооцохгүй” гэсэн гол зарчмыг цагдаагийн байгууллага барьж ажиллана. Хэрвээ алба хаагчид гэм буруутай нь тогтоогдсон тохиолдолд тэднийг өмгөөлж хамгаалах ёс зүй цагдаагийн байгууллагад байхгүй, тийм боломж ч байхгүй.” гэв.
Мөрдөн байцаах албаны дарга, хурандаа П.Очбадрах прокурорын зөвшөөрөгдсөн хэмжээнд мэдээллийг хүргэж байгааг онцлоод хувь хүний нууцтай холбоотой асуудлыг түгээх боломжгүй. Эмзэг мэдээлэл учир хэвлэл мэдээллийн байгууллага мэдрэмжтэй хандах хэрэгтэй байна гэлээ.
Сэтгэгдэл (0)
Сэтгэгдэл бичигдээгүй байна