Олон улсын эрүүгийн шүүх болон тус шүүхийн албан тушаалтнуудад энэ оны “Үзэл санааны эрх чөлөөний төлөөх Сахаровын нэрэмжит шагнал”-ыг олгохоор Европын Парламент шийдвэрлэжээ. Энэ нь АНУ-ын засаг захиргаа Олон улсын эрүүгийн шүүхийн эсрэг санхүүгийн болон технологийн өргөн хүрээтэй хориг тогтоосон үетэй давхцаж байгаагаараа онцлог юм.
2026 оны аравдугаар сарын 9-нд Дональд Трампын засаг захиргаа Олон улсын эрүүгийн шүүхийн эсрэг санхүүгийн болон технологийн өргөн хүрээтэй хориг тогтоосон. Тус шийдвэрийн хамгийн чухал онцлог нь шүүхийн шүүгч, прокурор зэрэг хувь хүмүүсээр хязгаарлагдахгүй, Олон улсын эрүүгийн шүүх байгууллагыг бүхэлд нь АНУ-ын хоригийн жагсаалтад оруулсан явдал юм.
Энэ нь Норвегийн Нобелийн хороо энх тайван болон олон улсын эрх зүйг хөгжүүлэхэд оруулсан хувь нэмрийг нь үнэлэн Олон улсын эрүүгийн шүүхийн шүүгч байсан Нави Пиллайд 2026 оны Энхтайваны шагналыг олгосон өдөр гарсан. Дональд Трамп уг шагналыг өөрт нь олгох ёстой байсан гэж мэдэгдсэн зэргийг зарим хэвлэлүүд тухайн үед онцолж байсан.
Олон улсын эрүүгийн шүүх Үзэл санааны эрх чөлөөний төлөөх Сахаровын нэрэмжилт шагнал олгосонд талархлаа илэрхийлжээ.
"Олон улсын эрүүгийн шүүх (ОУЭШ) болон тус шүүхийн албан тушаалтнуудад энэ оны “Үзэл санааны эрх чөлөөний төлөөх Сахаровын нэрэмжит шагнал”-ыг олгохоор шийдвэрлэсэн Европын Парламентад Олон улсын эрүүгийн шүүх талархал илэрхийлж байна.
Энэхүү шагналыг Олон улсын эрүүгийн шүүх болон түүний албан тушаалтнууд урьд өмнө байгаагүй сорилт бэрхшээлтэй, тэр дундаа шүүхийн бүрэн эрхийн хүрээнд хэрэгжүүлж буй үйл ажиллагаанд саад учруулах зорилготой хориг арга хэмжээнүүдтэй тулгарч буй энэ үед олгож байгаа нь онцгой ач холбогдолтой юм.
Ийм нөхцөлд Сахаровын нэрэмжит шагнал нь шүүхийн хараат бус байгууллагууд болон олон улсын эрх зүйг сахин хамгаалахын төлөө ажиллаж буй хүмүүсийн үйл ажиллагааны ач холбогдлыг дахин нотолж байгаагаараа онцгой утга учиртай юм. Түүнчлэн олон улсын эрүүгийн шүүх өөрийн бүрэн эрхийг хараат бусаар, шударга, алагчлалгүй хэрэгжүүлж, хамгийн хүнд ноцтой гэмт хэргийн хохирогчдын эрх ашгийг хамгаалан шударга ёсыг тогтооход олон улсын хамтын ажиллагаа, тасралтгүй дэмжлэг чухал болохыг энэхүү шагнал онцлон харуулж байна.
Энэ шагнал нь ял шийтгэлгүй үлдэх явдалтай тэмцэх, шүүх ажиллагааг шударгаар явуулах чиглэлээр Олон улсын эрүүгийн шүүхийн хэрэгжүүлж буй үйл ажиллагааг үнэлэн хүлээн зөвшөөрч буй хэрэг төдийгүй тогтвортой энх тайвны үндэс суурь болсон олон улсын шударга ёсны тогтолцооны үүрэг, ач холбогдлыг үнэлж буй чухал үйл явдал юм.
Зөрчил мөргөлдөөн улам бүр нэмэгдэж буй өнөөгийн дэлхий ертөнцөд шударга ёсгүйгээр энх тайван оршихгүй, хууль эрх зүйгүйгээр аюулгүй байдал хангагдахгүй." гэсэн байна.
Сэтгэгдэл (0)
Сэтгэгдэл бичигдээгүй байна