МОНТЕ-КРИСТО ГҮНГИЙН ЖИНХЭНЭ ТҮҮХ

“Монте-Кристо гүн” зохиолоо Александр Дюма бодит явдлаас сэдэвлэсэн тухай номны эхэнд хальт дурдсан байдаг. Мэдээж, зохиолч болсон явдлаас сэдэвлэсэн ч гэлээ үйл явдлуудыг өөрийнхөөрөө өөрчлөн зохиосон нь ойлгомжтой. Тэгвэл та бүхэнд Монте-Кристо гүний жинхэнэ түүхийг сонирхуулъя.

1807 онд Францын өмнөд хэсэгт орших Ним хотод Франсуа Пико хэмээх гуталчин залуу байжээ. Пико хайрт бүсгүй Маргаритатайгаа гэрлэхээр зэхэж, аз жаргалдаа умбана. Маргарита үзэсгэлэнтэйгээс гадна баян айлын охин. Тиймээс дэн буудлын эзэн Луппиан маш их атаархдаг гэнэ. Ингээд Луппиан Солари, Шобар хэмээх хоёр найзтайгаа нийлээд матаас бичжээ. Пиког язгууртан гаралтай, Английн тагнуул гэж матаас бичсэн тул удалгүй баривчлаад шоронд хорьчихож. Пико хэнээс, юунаас болж хоригдсон учраа ч эхэндээ ойлгосонгүй. Хайрт Маргарита нь хоёр жил гаруй сэтгэлээр унаж, шаналаад дараа нь Луппиантай гэрлэчихэв.
Шоронд хэдэн жилийг өнгөрүүлснийхээ дараагаар Пико тэнд Итали номлогч Торитой хамт хоригдох болжээ. Удаан хугацааг хамтдаа өнгөрүүлсэн тул Тори лам Милан хотын ойролцоо яг хаана алт эрдэнэсээ нууснаа зааж өгсний зэрэгцээ өөрийнхөө өв залгамжлагч болгож гэрээслэлдээ тэмдэглэсэн байна. Ингэж Пикод хөрөнгөө гэрээсэлснээсээ хойш удалгүй амгалан нойрсов.
1814 онд Наполеон Бонапарт Хаан ширээнээс буухад буюу шоронд 7 жил хоригдсоныхоо дараагаар Пико суллагджээ. Шоронгоос гармагцаа Нидерландын Амстердам руу яаран очиж, тэнд гэрээслэлийн дагуу Тори ламын албан ёсны өв залгамагч гэдгээ баталгаажуулсан байна. Үүнийхээ дараагаар Италид буцаж ирээд алт эрдэнэс нуусан газрыг хайж олжээ.
Ингээд Франсуа Пико юунаас, хэнээс болж хоригдсоноо олж мэдэхээр Анутан Аллотой уулзсан байна. Анутан матаас бичигт гарын үсэг зурж нүгэл үйлдээгүй ч гэлээ хэн хэн түүнийг хэрхэн бичсэнийг мэдэж байсан ганц гэрч юм. Түүнд 50 мянган франкийн үнэтэй бөгж бэлэгдэж болсон явдлыг бүхнийг яриулж авчээ. Ингээд Пико өшөө авалт руугаа шамдан орлоо.
Түүний өшөө авалт Дюмагийн бичсэн шиг тийм романтик шинжтэй байсангүй. Солариг хутгалж алаад, Шобарыг хордуулж хөнөөсөн байна. Дараа нь Луппианы эзэмшлийн ресторанд зөөгчөөр ажилд орлоо. Тэндээ Луппианы эхний гэрлэлтээс төрсөн охинтой танилцаж, өөртөө дурлуулжээ. Бүр хурим найр хийх дээрээ тулж зар гаргасны дараагаар өнөөх язгууртан гүн гээд байсан сүйт залуу нь үнэн хэрэгтээ шоронгийн хоригдол байсныг зарласан байна. Луппианы гэр бүл доромжлолын бай болж, охин нь тэр зовлонг даалгүй амиа хорложээ.
Луппианы эхний гэрлэлтээс төрсөн хүүг нь ч үнэт эдлэл хулгайлсан хэрэгт буруутган, баривчлуулж чадсан байна. Үүнийхээ дараагаар Пико рестораныг нь шатаагаад, харин Луппианыг өөрийн гараар хутгалж хөнөөжээ.
Гэвч Пикогийн ялалтаар энэ өшөө авалт дууссангүй. 50 мянган франкийн бөгжинд ам нээсэн Анутан Алло араас нь нэхэж явсаар гудамжинд гэтэж байгаад барьж авчээ. Пиког зүгээр ч нэг алчихсангүй. Подвалд аваачиж удтал тамлаж хөнөөсөн байна. Зорилго нь алт эрдэнэсээ хаана хадгалдгийг нь мэдэх байж.
Монте-Кристогийн энэ бодит өшөө авалтын түүх ердөө жил гаруйн хугацаанд л өрнөжээ. Харин өнөөх Анутан Алло Францаас оргон зайлж, Англи руу гарчээ. Хожим 1828 онд амьсгал хураахынхаа өмнө өөрийн хийсэн бүх гэм нүглээ наминчлахдаа бүхнийг ярьж, бүр бичгээр ч баталгажуулсан байдаг гэнэ.
Үүнээс хойш 15 жилийн дараа энэ аймшигт хэргийн материал Александр Дюмагийн гарт орж, эрүүгийн тун ноцтой хэргийн хавтсыг Дэлхий даяар алдартай өшөө авалтын жинхэнэ триллер зохиол болгожээ.