Манай улсын 1.2 сая иргэн хэрэглээний зээлтэй байдаг тооцоо байна. Монголбанкны Мөнгөний бодлогын хороо өнөөдөр /2026.11.03/ хуралдаж, хэрэглээний зээлийн бүтцийн өөрчлөлтийн зохицуулалтад өөрчлөлт оруулах тухай тогтоол баталжээ.
Санхүүгийн хүндрэлд орсон иргэд зээлийн хугацаагаа 48 хүртэл сараар уртасгах боломж уг тогтоолын дагуу бүрдэж байна.
Өр, орлогын хязгаарлалт болон хугацааны хязгаарлалттай зээлүүд тухайлбал цалин, малчны, автомашины зэрэг хэрэглээний зээл аваад санхүүгийн хүндрэлд орсон тохиолдолд хугацааг сунгаж. төлбөрийн хэмжээг бууруулах боломж хязгаарлагдмал байгааг харгалзан энэхүү зохицуулалтыг хийж байгаа аж.
Хэрэглээний зээлийг өр, орлогын харьцаа 45 хувьд хамаарах зээл, хамаарахгүй зээл гэж хувааж үздэг. Мөнгөний бодлогын хорооноос гаргасан өр, орлогын харьцааны хязгаарлалтад хамрах зээл цалингийн, малчны болон бусад гэж хуваагдана. Бодлогын шийдвэрийн үр нөлөө нь 8.5 их наяд төгрөгийн зээлтэй хамаатай байх аж. Үүний 6.3 их наяд нь цалингийн, 1.3 их наяд нь малчдын зээл, 0.9 их наяд нь бусад зээл байгаа аж. 2026 оны 9 дүгээр сарын байдлаар банкны салбараас иргэдийн зээлийн үлдэгдэлтэй нийт 1.2 сая зээлдэгчийн 66.4 хувь нь 45 хувиас дээш өр, орлогын харьцаатай байна.
Тэтгэврийн зээл болон хадгаламж барьцаалсан зээл дээр өр, орлогын харьцаа тооцож үздэггүй. Энэ нь 5.2 их наяд байгаа бөгөөд дээрх зээл хугацаа сунгахад орохгүй.
Өр, орлогын харьцааны хязгаарлалтад хамаарах хэрэглээний зээлийн чанаргүй зээлийн хувь 2026 оны 9 дүгээр сард 9.1 хувьд хүрч, өмнөх оны мөн үеэс 2.7 нэгж хувиар өсжээ.
Иргэд давхардуулан зээл авах тохиолдол маш ихэссэн. Банк болон банк бус санхүүгийн байгууллагаас олгох хэрэглээний зээлийн зохицуулалтын ялгаатай байдал нь иргэд олон байгууллагаас зэрэг зээл авч, улам бүр өрийн дарамтад ороход хүргэж байна.
Ийнхүү зээл төлөх хугацааг сунгаснаар зээлдэгчийн санхүүгийн дарамтыг бууруулж. зээлээ үргэлжлүүлэн төлөх, төлбөрийн чадвараа сэргээхэд дэмжлэг үзүүлэх ач холбогдолтой.
Монголбанк гаргасан шийдвэрээ хүргүүлснээр банкууд маргаашаас зээлийг сунгах хүсэлтийг хүлээн авч эхэлнэ.
Иргэд зээл авсан банкандаа хүсэлтээ гаргана. Шаардлагатай бол энэ зохицуулалтыг 1-ээс илүү хийж болох ч нийт хугацаа 48 сараас хэтрэхгүй байна. Зээлийн хүүг нэмэгдүүлэхгүй.
Банк, банк бус санхүүгийн байгууллагын хэрэглээний зээлийн зохицуулалт ялгаатай байгаа. Үүнийг өөрчилж, ирэх онд нэгдсэн бодлогоор хэрэгжүүлэхээр Мөнгөний бодлогын чиглэлд тусгажээ. Ер нь 2027 оны Мөнгөний бодлогын чиглэлд суурь асуудлыг шийдэхийг зорьсон байгаа. Хэрвээ суурь асуудлыг шийдэхгүй бол байдал өөрчлөгдөхгүй гэж Монголбанкны Ерөнхийлөгч С.Наранцогт мэдэгдсэн.
Банкны салбарт нийт 94.7 их наядын төгрөгийн актив байгаагаас тал орчим буюу 49.4 хувь нь зээл байгаа аж. Үүнээс хэрэглээний зээл нь 13.7 их наяд байна. 2025 оны 1 дүгээр улиралд хэрэглээний зээлийн чанаргүй хувь хэмжээ 3 хувь байсан бол 2026 оны 9 дүгээр сарын байдлаар 5.9 хувьд хүрч, ойролцоогоор 2 дахин өсжээ. Хэрэглээний зээл дээр чанаргүй гэх ангилал өндөр дүнтэй буюу 803.8 тэрбум төгрөг чанаргүй гэдэг ангилал руу орох гээд байгаа аж.
Валютын ханш өссөн эсэх талаарх асуултад Монголбанкны Ерөнхийлөгч С.Наранцогт "Монголбанкны албан ханш тогтвортой байгаа. Амралтын өдрөөр Найман шарга дээр нэмэгддэг тохиолдол гардаг. Нэг байгууллага үнээ нэмсний зургийг авч тавьсан байсан" гэж хариулсан. Мөн валютын нөөц хангалттай байгааг хэлсэн юм.
Сэтгэгдэл (0)
Сэтгэгдэл бичигдээгүй байна