АНУ-ын Миннесотад амьдардаг сиамын ихрүүд Эбби, Бриттани нар одоо 34 настай. Тэгвэл гурван жилийн өмнө Эбби нууцаар хуримаа хийсэн талаараа саяхан зарлажээ. Нөхөр нь АНУ-ын армид алба хааж явсан эдүгээ сувилагчаар ажиллаж буй Жош Боулинг хэмээх залуу аж.
TikTok-д өөрсдөө нийтэлсэн гэрэл зургууд дээр хуримын бүжгээ хийж байгаа болон бусад аз жаргалтай агшнууд харагдана. Одоо Эбби амьдралынхаа гол мөрөөдөл зорилго болох хүүхэд гаргахаар зэхэж байгаагаа нуусангүй.
1990 онд Эбби, Бриттани нарыг хорвоод мэндэлсний дараагаар сиамын ихрүүдийг салгаж болох ч амьдрах магадлал нь маш бага болно гэсэн тул аав ээж нь салгах мэс засал хийлгэхээс татгалзсан байна. Эбби биеийн зүүн талыг, харин Бриттани баруун талыг мэдэрч удирддаг. Тэдний өндөр нам зөрүүтэй, мөн өлсөж буйг мэдрэх нь өөр. Хоёулаа тусдаа зүрхтэй. Мөн гурван бөөртэйгээс бусдаар бүх зүйл нь нэг. Үе мөч ижил зэрэг мэдэрдэг болохоор машин барих гээд амьдралын энгийн зүйлс дээр реакц нь ижил.
“Бид хоёрыг яаж ээж болох гэж буй талаар Дэлхийн бүх хүн санаа тавьж, анхаарах хэрэггүй дээ. Хэзээ гэдэгт ч анхаарах шаардлагагүй. Бид хоёрын зан ааш их өөр” хэмээн Бриттани ярьсан бол Эбби “Тийм ээ, хэзээ нэгэн цагт бид ээж болно. Гэхдээ одоогоор энэ талаар яримааргүй байна” гэжээ.
Сиамын ихрүүд бүр багаасаа л олны өмнө гарч, жирийн амьдраад сурчихсан. 6 настайдаа Опра Уинфригийн шоу нэвтрүүлэгт уригдан оролцохдоо хэн хэндээ нууцаа ярьдаг, мөн нэгийнхээ мэдэрснийг зэрэг мэдэрдэг тухайгаа яриад харин нэг нэгнийхээ бодлыг “уншиж” чаддаггүйгээ ярин инээлгэж байсан юм. Дараа нь реалити-шоу, баримтат кино гээд олонтаа олны өмнө гарахдаа машин хэрхэн барьж сурсан, Европоор аялсан, мопедтой давхисан гээд олон адал явдлаасаа хуваалцаж байлаа.
Зарим хүмүүс тэдэнд дургүй. Ялангуяа нэг нь нөхөртэй болсон гэхээр бүр эгдүүцсэн гэнэ. Тэдгээр хүмүүст зориулан Эбби, Бриттани нар хэлэхдээ “Биднийг үзэн ядагчдад хандан хэлэхэд, бид хоёр танд таалагдахгүй байлаа ч гэсэн байнга биднийг хараад, үзээд байна гэдэг чинь бидний дэмжигч болчихсон байна гэсэн үг байхгүй юу” гэжээ.
Эбби, Бриттани хоёр хэрвээ ээж болбол сиамын ихрүүдээс хүүхэд төрүүлсэн анхны тохиолдол болох юм байна.
Сэтгэгдэл (0)
Сэтгэгдэл бичигдээгүй байна