Тайландад болж буй Miss Grand International-2026 тэмцээнд хятад бүсгүй манай улсыг төлөөлөн оролцож буй талаар Монгол Улсаас Тайландын хаант улсад суугаа Элчин сайдын яамнаас шаардлага хүргүүлжээ. Гэвч зохион байгуулагчид албан ёсны дүгнэлт ирүүлнэ гээд хариу өгөлгүй тэмцээн дуусах өдөр болж байна. Miss Grand International тэмцээний финалын шат өнөөдөр /2026.10.10/ болох юм.
Монгол Улсаас Тайландын хаант улсад суугаа Элчин сайдын яамнаас дараах мэдээллийг гаргажээ.
“Miss Grand International-2026” тэмцээнд оролцогчийн тухай
Тайландын Хаант Улсын Бангкок хотноо 2026 оны 9 дүгээр сарын 18-наас 10 дугаар сарын 10-ны өдөр болж буй “Miss Grand International-2026” тэмцээнд гадаад улсын иргэн Монгол Улсын нэрээр оролцож байгаатай холбогдуулан Элчин сайдын яам энэ тэмцээнийг зохион байгуулж буй Miss Grand International Public Limited Company (MGI PCL) компани, энэ компанийн Гүйцэтгэх захирал Нават Исаракрайсинд албан ёсоор удаа дараа хандаад байна.
Чингэхдээ нэгдүгээрт, дээрх оролцогч нь Монгол Улсын иргэн биш, хоёрдугаарт, манай улсаас “Miss Grand International-2026” тэмцээнд оролцуулахаар шалгаруулж тодорхойлсон нэг ч оролцогч байхгүй тул Монгол Улсын нэр, туг далбаа, үндэсний хувцас хэрэглэлийг ийнхүү дур мэдэн хэрэглэж байгааг даруй зогсоож, шаардлагатай тайлбар, мэдэгдэл хийхийг шаардсан.
Зохион байгуулагчид манай талаас тавьсан шаардлагыг хүлээж авснаа мэдэгдэхийн зэрэгцээ эл оролцогчийн иргэншил, харьяаллыг баталгаажуулах, энэ хүрээнд холбогдох бичиг баримтад дотоод хяналт шалгалт хийж байгаа бөгөөд бидэнд албан ёсны дүгнэлт хариуг ирүүлнэ хэмээсэн боловч өнөөдрийг хүртэл энэ дүгнэлт хариу ирээгүй байна.
Тус Элчин сайдын яам асуудлыг шийдвэрлэх чиглэлээр үргэлжлүүлэн ажиллаж байна.
МОНГОЛ УЛСААС ТАЙЛАНДЫН ХААНТ УЛСАД СУУГАА ЭЛЧИН САЙДЫН ЯАМ
Сэтгэгдэл (0)
Сэтгэгдэл бичигдээгүй байна