МӨНГӨ, НЭР АЛДАР ХӨӨЦӨЛДӨХ НЬ СЭТГЭЛИЙН АМАР АМГАЛАНД ХАМГИЙН ИХ СААД УЧРУУЛДАГ

Өнөөдөр Дэлхийн аз жаргалын өдөр. Аз жаргал гэж юу вэ. Энэ талаарх судалгааг Харвардын эрдэмтэд 75 жилийн турш хийсэн байдаг бөгөөд энэ нь хүн төрөлхтний түүхэн дэх хамгийн урт хугацааны судалгааны нэгд тооцогддог. Хүүхэд байхаас нь хөгширтөл нь 75 жилийн турш 724 хүнтэй байнга ярилцлага хийж, аз жаргалын тухай бодол санаа нь ямар үйл явдлын дараа хэрхэн өөрчлөгдөж байгааг судалжээ.

Тус судалгааны үр дүнг Харвардын сэтгэл зүйн ухааны доктор, сэтгэлзүйч Роберт Жи Валдингир TED илтгэлээр нэлээд хэдэн жилийн өмнө олон нийтэд танилцуулсан. Судалгааны гол дүгнэлт нь Аз жаргал гэдэг бол Хайр юм гэсэн агуулгатай байв. Гэхдээ хайр гэдгийг зөвхөн хосуудын дурлал биш, ээж аав, гэр бүл, найз нөхдийн хайр, өөрийгөө болон амьдралыг бусдыг хайрлах хайр гэсэн өргөн утгаар авч үзсэн байна.
Аз жаргалын нууц бол зөвхөн олон найзтай, их хүрээлэлтэй байх биш, найз нөхдийн болон бүх харилцаа нь үнэн байх, сэтгэлээ онгойтол ярилцах итгэж болох ойрын нөхөд, хамтрагчтай байх нь чухал байдгийг онцолжээ. Үнэн сэтгэлээсээ ярилцах хүнгүй үед хүн ганцаардлыг маш ихээр мэдэрдэг бөгөөд энэ нь аз жаргалтай амьдрал байтугай, эрүүл мэндэд сөргөөр нөлөөлдөг. Ганцаардал хүнийг дотроос нь архи, хорт зуршлаас ч илүүгээр устгаж байдаг гэж үзсэн байдаг.
Мөн эрүүл мэндээ хайрладаг байх нь өөрт нь болоод эргэн тойрныхонд нь эерэг нөлөөтэйг онцолсон.
Хүний сэтгэлийн амар амгалан байдалд хамгийн их саад учруулдаг зүйл бол мөнгө, нэр алдар хөөцөлдөх гэж уг судалгаагаар гарчээ. Бусдад өөрийгөө, хийж бүтээснээ хүлээн зөвшөөрүүлэх, ямар нэгэн зүйл батлан харуулах гэж зүтгэн мөнгө, алдар нэр хөөцөлдөх нь сэтгэлийн амар амгалан байдалд хамгийн их саад болдог байна. Харин бусдын үзэл бодлыг хүндлэн, байгаагаар нь хүлээн зөвшөөрч сурах нь сэтгэлийн амар амгалан, тайван амьдралын гол нууц гэжээ.
Хүний амжилтад гэр бүлийн гарал угсаа биш, суурь хүмүүжил, харилцаа нөлөөлдөг гэж уг судалгаагаар гарсан байдаг. Амьдралын хамгийн хэцүү зүйл бол хүмүүс хоорондын харилцаа, сайхан амьдрал сайн харилцааны үндсэн дээр бий болдог гэдгийг судалгааны дүн харуулжээ.