ХУВЬ ЗАЯА ХУВЬСАМТГАЙ

Өнөөдөр та хүнд байдалд орж, бүх зүйл тань муу байлаа ч гэсэн дэргэд чинь буй бусдын хөгжилтэй, сайн сайхан байгаад бухимдаж, сэтгэл санаанд нь битгий нөлөөлөөрэй. Үүрийн дөрвөн цагт ханан цаана чинь хашгиралдах хөршийн тухай яриагүй нь мэдээж. Хор уршиг учруулж, хил хязгаарыг давсан тохиолдолд өөр хэрэг ээ.

Энгийн л нэг сайхан баяр байдаг даа. Бүгдээрээ хөгжилтэй, баяртай, гоёод, инээмсэглээд сэтгэл гарган бэлэг авчирдаг тийм баяр... Харин чи уйтгартайхан бас амьдралын хүнд ачаандаа түүртэн зогсоно. Эсвэл бүр гүүрэн дээр үүнээс үсэрвэл муугүй ч юм уу гэж санагдах ч үе бий. Юу ч бүтэхгүй мөчүүд байдаг даа, хүнд...
Ядруухан хувцасласан нэгэн хөгшин уурга хаян сууна. Өглөөнөөс хойш л гүүрэн дээрээс загас барихыг оролджээ. Загасчлал амжилтгүй. Өвгөний дэргэд алаг нохой загас горьдон цагариглана. Гэвч хөгшин жараахай ч барьж чадсангүй.
Гүүрэн дээр яг хажууханд нь хуримын цуваа иржээ. Тосгоны шуугиантай хурим: бүгдээрээ чангаар ярилцаж, дуулалдан, инээлдэнэ. Бүх загасыг үргээчихлээ! Хүмүүс хөгжилтэй, харин өвгөн гунигтай байлаа. Тэр юу ч барьсангүй. Нохойгоо дагуулаад уурга, хоосон хувингаа аваад явахаас. Сэтгэлээр унажээ.
Хуримын цуваа тэр мөчид өвгөний хажуугаар өнгөрлөө. Хөгшин үрчгэр нүүрийнхээ хуниас бүрийг тэнийлгэн баяртайгаар инээмсэглэлээ. Оройвч малгайгаа авч бөхийн залуу хосод чин сэтгэлээсээ баяр хүргэв. Нохой нь ч чимээ гарган хуцаж урд хөл дээрээ үсрэн баярыг хуваалцлаа.
Яахав дээ, загасчлал амжилтгүй болоо л биз. Залуусын аз жаргалд баяр хүргэх хэрэгтэй шүү дээ. Бусдын аз жаргалд баярладаг байх..
Залуу хос өвгөнд талархлаа илэрхийлж, найрсгаар мэндчиллээ.
Хагас цагийн дараа өвгөн, нохойтойгоо эргийн дэргэдэх нээлттэй кафед бүгдийн хамт шорлог идэж суулаа. Шорлог, шарсан хавирга, пирожки, банш, шөл бүх төрлийн амттан.... Хөгжим эгшиглэж, бүгд хөгжилдөн бүжицгээнэ. Сайхан сэтгэлт загасчин дүүрэн жаргалтай, түүнийг бүжигт урьсан ч толгой сэгсрээд саарал шөнийн тухай дуу дуулжээ. Харин нохой нь хөгжин бүжжээ.
Хувь заяа хувьсамтгай. Хоосон хувинтай гүүрэн дээр зогсож дэгээ хаяад бүтэл муутай л байж. Хүмүүс ирж, баяр эхэлж, тэдний аз жаргалыг хуваалцах боломж ч бас гарчээ. Бусдын сайн сайхан байгаад уурлаж уцаарлаж, дургүйцдэгггүй байхад л болно. Тэдний өмнөөс баярлаж, бас хэрэгтэй бол баяр хүргэх нь хүний ёс. Ердөө ингэхэд л бүх зүйл сайн тал руугаа эргэдэг. Ийм зүйл болдог нь надад байнга ажиглагддаг юм.
Бусдын аз жаргалд баярлаж, баяр хүргэдэг хүн сайхан зүйл хүртдэг. Аз жаргалын хэлтэрхий, магадгүй ганц зүсэм бялуу: яагаад болохгүй гэж. Аз жаргал бүгдэд хүрэлцдэг. Та өнөөдөр гунигтай байлаа ч бусдын аз жаргалд баясах нь л гол. Аз жаргал тэгвэл таныг ч бас тойрохгүй.                                      Анна Кирьянова