"ТӨВ ЦЭНГЭЛДЭХ ХҮРЭЭЛЭН" КОМПАНИЙН АСУУДЛААР АТГ-Т ХАНДЛАА

Нийслэлээс “Төв цэнгэлдэх хүрээлэн” компанийн бүртгэл болон газрын асуудлаар АТГ-т хандлаа. Нийслэлийн Засаг даргын орлогч О.Номинчимэг "Төв цэнгэлдэх хүрээлэнгийн газрын асуудлаар ажлын хэсэг гарсан. 2007 онд "Төв цэнгэлдэх хүрээлэн" компанийн эзэмшлийг 100 хувь нэг  хүний нэр дээр бүртгэсэн. Энэ үед нийслэл 51, 49 хувийг эзэмших асуудлаар шүүхэд хандаж байсан. Гэтэл гэмт хэргийн чанартай баримт бичгүүдийг үндэслэж, УБЕГ 2007 онд "Төв цэнгэлдэх хүрээлэн" компанийг 100 хувь нэг хүний эзэмшилд бүртгээд 17 жил явж ирсэн. Бид үүнийг мэдээд 2023 оны 12 дугаар сард засч залруулсан.  

Нэг хүний эзэмшилтэй компани бүртгэл хийлгэснээс хойших хугацаанд Төв цэнгэлдэх хүрээлэнгийн газруудыг ТУЗ-ын албан ёсны шийдвэргүйгээр бусдад шилжүүлж эхэлсэн. Хууль бусаар газар шилжүүлсэн асуудлууд хөндөгдөж байгаа учир 2007 оны тавдугаар сарын 15-нд "Төв цэнгэлдэх хүрээлэн" компанийг улсын бүртгэлд 100 хувь нэг хүний эзэмшилд бүртгэсэн асуудлыг гэмт хэргийн шинжтэй гэж үзэж, АТГ-т гомдол гаргаж байна.

Улсын бүртгэлд бүртгүүлсэн процессыг харвал материал гаргаж өгөхөөс гурван хоногийн өмнө иргэн Жавзмаа 0.45, Т.Нямдаваа 0.92, З.Ариунаа 0.61, Т.Нямдаваа 28.2 хувь, нийлээд 30 хувь, нийслэл 70 хувийг эзэмших шийдвэр 2000 онд гарч байсан юм. Гэтэл энэ хүмүүсээ хуралдуулаад бүх хувьцаагаа Т.Нямдаваад 30 хувийг дангаар эзэмшүүлж байна гэсэн шийдвэр гаргасан. Энэ бичиг баримтаа Улсын бүртгэлд өгөөд 100 хувь  нэг хүний эзэмшилд бүртгэж өгнө үү гэдэг хүсэлтийг гаргасан байгаа юм. Уг хүсэлтийг үндэслэн Улсын бүртгэлийн газар "Төв цэнгэлдэх хүрээлэн" компанийг нэг хүний өмчид бүртгэсэн.

Дүрэм зэрэг харах ёстой зүйлсийг харалгүйгээр ердөө л энэ хүсэлтэд тулгуурлаад 100 хувь гээд бүртгэчихсэн асуудлыг шалгаж өгөөч гэж байгаа. Хэрвээ энэ шийдвэр хууль бус бол үүнээс хойш эдгээр хүмүүсийн гаргасан шийдвэрүүд ч хүчин төгөлдөр бус гэдэг асуудал ярина. Үүний дагуу олгосон газар олголтуудыг ч бас хууль эрх зүйн хүрээнд харах ёстой болно.” гэж ярилаа.

Мөн тус компанийн удирдлагад овог, нэр ижил хоёр Нямдаваа байсан нь нийслэлийг ч төөрөгдүүлж байгаа, энэ асуудлыг тодруулах талаараа дурдав. Төв цэнгэлдэх хүрээлэнгийн эргэн тойронд баригдсан орон сууцыг худалдан авсан оршин суугчдын хувьд эрх нь ямар нэг байдлаар хөндөгдөхгүй гэдгийг О.Номинчимэг хэлсэн юм.