ВАЛИЕВА, КОНДРАТЮК, СТЕПАНОВА, БУКИН НАР СПОРТЫН АРБИТРЫН ШҮҮХЭД НЭХЭМЖЛЭЛ ГАРГАНА

Уран гулгалтын од Камила Валиева болон Марк Кондратюк нарт олгосон төвийг сахисан тамирчны статусыг цуцалсан асуудлаар тамирчид давж заалдсан ч Олон улсын тэшүүрийн холбоо (ISU) тэдний гомдлыг хэрэгсэхгүй болгожээ.

Мөн Оросын уран гулгагч Александра Степанова, Иван Букин нарт анхнаасаа нейтрал статус олгоогүй байна. Энэ талаар Олон улсын тэшүүрийн холбооны албан ёсны сайтад дараах мэдэгдлийг нийтэлжээ.

“Тамирчин бүрийн шаардлага хангаж байгаа эсэхийг тус тусад нь үнэлсний үндсэн дээр Олон улсын тэшүүрийн холбоо Марк Кондратюк болон Камила Валиева нарыг тусгай төвийг сахисан тамирчин буюу AIN статусаар оролцох шаардлагыг цаашид хангахгүй болсон гэж тогтоосон. 

Мөн Александра Степанова, Иван Букин нар тусгай төвийг сахисан тамирчны шаардлагыг хангахгүй бөгөөд ISU-гийн тэмцээнүүд болон олон улсын тэмцээнд AIN статусаар оролцох эрхгүй гэж үзсэн. Эдгээр шийдвэр бүрийг ISU-гийн Үндсэн хууль болон дүрэм, журмын дагуу давж заалдах боломжтой. Давж заалдах хугацаа дуусахаас өмнө тухайн хэргүүдийн талаар нэмэлт тайлбар хийхгүй” гэж мэдэгдэлд дурджээ.

Төвийг сахисан статусыг цуцалсан тохиолдолд тамирчид шийдвэрийг тав хоногийн дотор давж заалдах эрхтэй бөгөөд Кондратюк болон Валиева энэ эрхээ ашигласан боловч үр дүнд хүрсэнгүй. Одоогийн байдлаар тэд олон улсын тэмцээнүүдэд оролцох эрхгүй хэвээр үлдэж байна. 

Тэдний хувьд олон улсын тэмцээнд улс төрийн ялгаварлалгүйгээр оролцох эрхээ шүүхээр хамгаалах боломж л үлдэж байна.

Уран гулгагчид Спортын арбитрын шүүхэд (CAS) хандаж, ISU-гийн шийдвэрийг эсэргүүцэхээр төлөвлөж байгаа талаар ОХУ-ын Спортын сайд бөгөөд Оросын Олимпын хорооны тэргүүн Михаил Дегтярёв мэдээлжээ.

Тэрээр “Оросын уран гулгалтын холбоо болон ISU-гийн ивээл дор зохион байгуулагддаг олон улсын тэмцээнүүдэд оролцох эрхээ шударга бусаар хасуулсан манай уран гулгагчид ойрын хугацаанд ISU-гийн эсрэг Спортын арбитрын шүүхэд нэхэмжлэл гаргана. Манай тамирчид болон холбоонд хууль зүйн дэмжлэг үзүүлж, тэр дундаа мэргэшсэн өмгөөлөгчөөр хангана” гэж хэлснийг ТАСС агентлаг мэдээлсэн байна. 

ОХУ-ын Спортын сайд өөрөө уг асуудалд оролцож байгаа нь тамирчдын хувьд эерэг дохио, өнөөг хүртэл Дегтярёв идэвхтэй оролцсон хэргүүд Оросын талд ашигтайгаар шийдэгдэж байсан гэж хэвлэлүүд мэдээлж байна. 

ISU-гийн эцсийн хариуг хүлээн авснаас хойш CAS-д 21 хоногийн хугацаанд хандах зохицуулалттай аж.  Спортын арбитрын шүүхийн журмын хэргийг ердийн горимоор хянан шийдвэрлэхэд ихэвчлэн 3–6 сар шаардагддаг. Гэхдээ үйл явцыг түргэтгэх боломжтой. Хэрэв ISU зөвшөөрвөл хэргийг түргэвчилсэн буюу “fast-track” журмаар 2-4 долоо хоногийн дотор хэлэлцэж болно.

Оросын уран гулгалтын холбоо Валиева, Кондратюк, Степанова, Букин нарын статусын асуудлаар тайлбар хийж, тамирчдад шаардлагатай бүхий л дэмжлэг үзүүлж байгаагаа мэдэгдэв.

Түүнчлэн тамирчид болон тэдний өмгөөлөгчдийн зөвшөөрөлгүйгээр уг асуудлын талаар цаашид дэлгэрэнгүй тайлбар хийх нь хамгаалалтын стратегид сөргөөр нөлөөлж болзошгүй гэж холбоо үзжээ.

Оросын уран гулгалтын холбооны хэвлэлийн албаны мэдэгдэлд “Камила Валиева, Марк Кондратюк, Александра Степанова, Иван Букин нарын тамирчны статустай холбоотой нөхцөл байдлын талаар Оросын уран гулгалтын холбоо мэдээлэл авсан. Олон улсын тэшүүрийн холбооны шийдвэрийн дагуу Оросын уран гулгагчид нейтрал статусаар оролцож байгаа хэдий ч манай холбоо тамирчдад шаардлагатай бүхий л дэмжлэгийг байнга үзүүлсээр ирсэн бөгөөд цаашид ч үзүүлэх болно.

Бид үүссэн нөхцөл байдлыг шийдвэрлэхийн тулд боломжтой бүх арга хэмжээг ашиглаж байна. Мөн тамирчдад туслалцаа үзүүлэхэд бэлэн байгаагаа илэрхийлсэн бүх байгууллагад талархаж байна. Үүний зэрэгцээ тамирчид болон тэдний өмгөөлөгчдийн зөвшөөрөлгүйгээр уг нөхцөл байдлын талаар цаашид тайлбар өгөх нь хамгаалалтын стратегид сөргөөр нөлөөлж болзошгүй тул үүнийг боломжгүй гэж үзэж байна” гэжээ.

Оросын нэрт бүжиг дэглээч, мөсөн шоуны продюсер Илья Авербух одоогийн нөхцөл байдал Александра Степанова, Иван Букин нарын спортын замналд ноцтой хохирол учруулж байна гэж үзсэн байна.

Тэрээр “Харамсалтай нь Саша Степанова, Ваня Букин хоёрт бүр төвийг сахисан статус ч олгоогүй. Тиймээс найдвар маш бага байсан. Энэ шийдвэр ч үндэслэлгүй. Тэд бол ямар ч эргэлзээгүй маш авьяаслаг уран гулгагчид. Олон улсын тэмцээнд оролцож чадахгүй байгаа нь тэдний спортын замналд асар их хохирол учруулж байна. Түүгээр ч барахгүй тэд олон жилийн турш ISU-гийн шийдвэрүүдийн хохирогч болсоор ирсэн. Тухайлбал, энэ хосыг 2018 оны Олимпын наадамд оролцуулаагүй” гэж ТАСС-д ярьжээ.

Спортын нэрт тайлбарлагч, телевизийн хөтлөгч Дмитрий Губерниев ч Спортын арбитрын шүүхэд хандаж, эрхээ хамгаалах ёстой гэж үзэж байна.

Тэрээр “Чемпионат” сайтын сурвалжлагч Егор Кабактай ярилцахдаа “Тэднийг аль хэдийн тэмцээнээс хасчихсан. Шаардлага хангахгүй гэж үзсэн нь тодорхой байна. Одоо яах ёстой вэ? Шүүхэд хандаж, нотлох баримтаа гаргаж, давж заалдах хэрэгтэй. Уран гулгагчдыг хасчихсан. Тэгэхээр давж заалдаж, шүүхдэх ёстой. Тэд ямар шаардлагыг хангахгүй байгаа юм бэ? Өөр юуг нь хангахгүй гэж үзээд байгаа юм? Шударга ёсыг тогтоолгохын төлөө тэмцэх хэрэгтэй. Энд найдварын тухай яриад байх шаардлагагүй. Хийх ёстой зүйлээ хий, дараа нь юу болохыг харна. Хууль зүйн хүрээнд боломжтой бүх арга хэрэгслийг ашиглан шүүхэд хандаж, манай тамирчдыг тэмцээнд оролцуулах шийдвэр гаргуулахын төлөө тэмцэх ёстой” гэжээ.

Хэвлэл мэдээллийн хэрэгслүүд уг шийдвэрийг Украины уран гулгалтын холбооноос гаргасан гомдолтой холбоотой байх магадлалтай гэж мэдээлж байгаа юм. Украины холбооны мэдэгдэлд Камила Валиева нь Татьяна Навкагийн сургуульд бэлтгэл хийдэг болохыг онцолжээ. Татьяна Навка нь ОХУ-ын Ерөнхийлөгч Владимир Путины хэвлэлийн нарийн бичгийн дарга Дмитрий Песковын эхнэр юм. Навка 2022 оноос хойш Европын Холбооны хориг арга хэмжээнд багтсан бөгөөд хоригийн үндэслэлд “Украины нутаг дэвсгэрийн бүрэн бүтэн байдал, бүрэн эрхт байдал, тусгаар тогтнолыг алдагдуулах буюу түүнд заналхийлсэн үйл ажиллагаатай холбоотой” гэж дурдсан байдаг.

Сануулахад, энэ оны наймдугаар сард Камила Валиева олон улсын тэмцээнд төвийг сахисан тамирчны статусаар оролцох зөвшөөрөл авсан нь тодорхой болсон юм.

Олон улсын тэшүүрийн холбоо (ISU) түүнийг холбогдох шалгуур, дүрэмд нийцэж байгаа эсэхийг шалгасан. Тухайн шалгуурын дагуу тамирчин нь Украинд явуулж буй Оросын “цэргийн тусгай ажиллагаа”-г олон нийтэд дэмждэггүй байх, мөн ОХУ-ын Зэвсэгт хүчинд алба хаадаггүй байх шаардлагатай байв. Тэр үед Валиева эдгээр шалгуурыг хангаж байсан. Гэвч Валиевагийн оролцох ёстой байсан “Challenger” цувралын Kinoshita Group Cup олон улсын тэмцээн эхлэхийн өмнөхөн түүний төвийг сахисан статусыг цуцалжээ.

Түүнтэй хамт Оросын өөр нэг уран гулгагч Марк Кондратюкийн төвийг сахисан статусыг мөн цуцалсан байна.

Уран гулгалтын од,  20 настай  Камила Валиева Олон улсын тэшүүрийн холбоо (ISU) түүний төвийг сахисан тамирчны статусыг цуцалсан шийдвэрийг сэтгэлзүйн хувьд хүндээр хүлээн авч байгаа ажээ. 

“Мash на спорте” Telegram сувгийн мэдээлснээр Валиева болсон явдалд “маш хүндээр шаналж байгаа” гэнэ. Одоогоор уран гулгагч бүсгүйд түүний найз залуу 33 настай хоккейчин Никита Нестеров дэмжлэг үзүүлж байгаа аж.

Уран гулгалтын алдарт од Камила Валиеваг эрхийг нь зөрчиж, албаар тэмцээнд оролцуулахгүй байна, түүн шиг авьяаслаг уран гулгагч үгүй хэмээн шүтэн бишрэгчид нь санал бодлоо илэрхийлж байгаа юм.