Хөгжлийн банкны гэх 80 хүн, 4 хуулийн этгээдэд холбогдох, 506 хавтастай хэргийг Нийслэлийн Эрүүгийн хэргийн давж заалдах шатны шүүх 2024 оны 3 дугаар сарын 7-ны өдөр “Улаанбаатар” чуулгын байранд хэлэлцэнэ.
Уг хэргийг шүүсэн анхан шатны шүүх хуралдаан ажлын 47 хоног үргэлжилж, 7 дугаар сарын 7-нд шийтгэх тогтоолоо уншсан. Анхан шатны шүүхээс 48 хүнийг цагаатгаж, 32 хүн, дөрвөн хуулийн этгээдийг гэм буруутайд тооцсон. Хэрэгт холбогдсон албан тушаалтнуудаас УИХ-ын гишүүн Ё.Баатарбилэгийг авлига авсан гэж үзэж, нийтийн албанд томилогдох эрхийг дөрвөн жилээр хасч, 6 жил хорих л оногдуулсан. Харин УИХ-ын гишүүн Г.Амартүвшин, Х.Ганхуяг, гишүүн асан Н.Алтанхуяг нарын хэргийг хэрэгсэхгүй болгож, цагаатгасан юм.
Хэдийгээр Ё.Баатарбилэгт хорих ял оногдуулсан ч хуулийн дагуу давж заалдах шатны шүүхийн шийдвэр гартал УИХ-ын гишүүний бүрэн эрхийн хүрээнд хорих боломжгүй зохицуулалттай. Хэрвээ давж заалдах шатны шүүх УИХ-ын гишүүн Ё.Баатарбилэгт оногдуулсан хорих ялыг хэвээр үлдээвэл тухайн мөчөөс эхлэн хоригдох болно. Хөгжлийн банкны гэх хэрэг дээр шүүгдэгч болон өмгөөлөгч нараас 36 гомдол гаргасны дотор Ё.Баатарбилэгийн давж заалдах шатны журмаар гаргасан гомдол бий.
Мөн Нийслэлийн прокурорын газраас “Хөгжлийн банк”-ны гэх хэрэгт нэр бүхий 48 хүний хэргийг үндэслэлгүй хэрэгсэхгүй болгосон, зарим шүүгдэгч нарт зорчих эрх хязгаарлах, торгох ял оногдуулсан нь тэдгээрийн үйлдсэн гэмт хэрэгт тохироогүй, ял хөнгөдсөн гэж үзэн анхан шатны шүүхийг шийдвэрийг хүчингүй болгуулахаар эсэргүүцэл бичсэн юм.
Давж заалдах шатны шүүх прокурорын эсэргүүцлийг хүлээн авах уу гэдэг нь удахгүй тодорхой болно.
Сэтгэгдэл (0)
Сэтгэгдэл бичигдээгүй байна