Авлигатай тэмцэх газраас чиг үүргийнхээ хүрээнд дүн шинжилгээ хийхэд Монгол Улсаас хилийн чанадад суугаа Дипломат төлөөлөгчийн газрууд үйлчилгээ үзүүлэхдээ визийн болон тэмдэгтийн хураамжтай холбоотой мэдээллийг ил тод байршуулаагүй, тодорхой хүргээгүйн улмаас иргэдэд ойлгомжгүй нөхцөл байдлыг үүсгэж, хүнд суртал чирэгдэл учруулах эрсдэл бий болсон байжээ.
Иймд мэдээллийн ил тод байдлыг хангаж хүнд суртал, чирэгдлээс урьдчилан сэргийлэх чиглэлээр иргэдэд шаардлагатай мэдээллийг нэгдсэн нэг агуулгаар, ойлгомжтой байдлаар ил тод байршуулж хүргэх, визийн болон үйлчилгээний хураамжийг хэрхэн хураах талаар чиглэл өгч, хяналт тавих зохион байгуулалтын арга хэмжээг авч хэрэгжүүлэх талаарх шаардлагыг Гадаад харилцааны яаманд хүргүүлсэн байна.
Гадаад харилцааны яамнаас холбогдох арга хэмжээг авч, Монгол Улсаас хилийн чанадад суугаа Дипломат төлөөлөгчийн газрууд оршин суух зөвшөөрөл олгох, виз, оршин суух зөвшөөрлийн хүсэлтийг хянах, бүртгэх, үйлчилгээ үзүүлэхэд хураах тэмдэгтийн хураамж, визийн үйлчилгээний хөлсний хэмжээг тухайн орны валютад шилжүүлэн, холбогдох мэдээллийн хамт байгууллагын цахим хуудсанд байршуулж иргэд, олон нийтэд мэдээллийг нэг агуулга, хэлбэрээр нээлттэй, ил тод, ойлгомжтой хүргэх чиглэлээр Авлигатай тэмцэх газраас хүргүүлсэн шаардлагыг бүрэн хэрэгжүүлжээ. Ингэснээр иргэдэд хэрэгцээтэй байдаг визтэй холбоотой мэдээллийг Монгол Улсаас хилийн чанадад суугаа Дипломат төлөөлөгчийн газрын цахим хуудсаас шууд харах боломжтой болсон байна.
Сэтгэгдэл (0)
Сэтгэгдэл бичигдээгүй байна