ОРОН СУУЦНЫ ЗАЛИЛАН ХИЙЖ, 3111 ИРГЭНД 107.1 ТЭРБУМЫН ХОХИРОЛ УЧРУУЛСАН 173 ХЭРЭГТ МӨРДӨН ШАЛГАХ АЖИЛЛАГАА ЯВУУЛЖ БАЙНА

Орон сууцны залиланд өртөж, хохирсон иргэдийн асуудлыг шалгах Ажлын хэсгийн ээлжит хуралдаан өнөөдөр /2026.08.20/ боллоо. Ээлжит хуралдаанаар Хот байгуулалт, барилга, орон сууцжуулалтын яам, Хууль зүй, дотоод хэргийн яамны дэд ажлын хэсгийн тайлан мэдээллийг сонсож, цаашид хэрэгжүүлэх арга хэмжээ, тулгамдаж буй асуудлуудын талаар хэлэлцсэн байна. 

Ажлын хэсгийн хүрээнд холбогдох байгууллагууд:

• 3,111 иргэнд 107.7 тэрбум төгрөгийн хохирол учруулсан 173 хэрэгт мөрдөн шалгах ажиллагаа явуулж байна.
• Шүүхийн шийдвэр гүйцэтгэх байгууллага 67.2 тэрбум төгрөгийн 1,135 гүйцэтгэх баримт бичигт ажиллагаа явуулж байна. Ажлын хэсэг байгуулагдсанаас хойш 452.4 сая төгрөгийн 4 гүйцэтгэх баримт бичгийг дуусгавар болгож, 4 иргэний орон сууцны өмчлөх эрхийг баталгаажуулжээ.
•  Улсын бүртгэлийн байгууллагад 274 дуусаагүй барилгад тэмдэглэл хийж, 82 үл хөдлөх хөрөнгийн бүртгэлийг түдгэлзүүлсэн байна.
• Цаашид иргэдийн орон сууцны захиалгын гэрээг давхардуулан байгуулах эрсдэлийг таслан зогсоох, иргэдийн эрх ашгийг хамгаалах зорилгоор түр журмыг боловсруулж байна.

Уг журмаар захиалсан орон сууц, талбайн мэдээллийг бүртгэх, урьдчилсан тэмдэглэл хийх, иргэн өөрийн мэдээллийг нээлттэй шалгах боломжийг бүрдүүлэхээр ажиллаж байна.

Ажлын хэсгийн ахлагч, Хууль зүй, дотоод хэргийн сайд С.Амарсайхан холбогдох албан туушаалтнуудад;

• Иргэдийн хохирлыг барагдуулахад онцгой анхаарч ажиллах
• Хэрэгт холбогдсон орон сууцны компани, аж ахуй нэгжүүдийн нуугдмал хөрөнгийг илрүүлэх
• Шүүхийн шийдвэр шийдвэр гүйцэтгэх ажиллагааг эрчимжүүлэхийн зэрэгцээ орон сууцны захиалгын харилцааг зохицуулсан эрх зүйн орчныг боловсронгуй болгох
• Орон сууц захиалгатай холбоотой хамгийн их хохирогчтой 14 компанийн хэргийг шуурхай шийдвэрлэж чадвал нийт хэргийн 60 орчим хувийг нь шийдвэрлэх боломжтой гэж ажлын хэсгийн бүрэлдэхүүн үзэж байгаа учир холбогдох байгууллагууд шуурхай ажиллаж, бодит үр дүн гаргаж ажиллах үүрэг чиглэлийг өглөө.

 Орон сууцны захиалга өгч хохирсон иргэдийн эрх ашгийг хамгаалах, учирсан хохирлыг шуурхай барагдуулах, цаашид иргэдийг ижил төрлийн эрсдэлд орохоос урьдчилан сэргийлэх нь Ажлын хэсгийн гол зорилго юм.