Өчигдөр Германы Бундеслигийн 27 дугаар тойрогт “Байер Леверкузен” талбайдаа “Хоффенхайм”-д хожигдож яваад тоглолтын төгсгөлд хожлын гоол хийж, 2:1-ээр хожлоо. Ингэснээр энэ улиралд тэд лигтээ 27 тоглохдоо 23 хожиж, 4 тэнцэж, нэг ч хожигдоогүй гайхамшигтай үзүүлэлттэйгээр итгэл төгс тэргүүлсэн хэвээр байна.
Харин тэдэнтэй аваргын төлөө өрсөлдөх магадлал хамгийн өндөр “Байерн Мюнхен” талбайдаа “Боруссиа Дортмунд”-д 0:2-оор хожигдсоноор Хаби Алонсогийн “Байер”-т 13 оноогоор хол тасрах боломж олгов.
Энэ нь аваргын болзлоо хангасанд бараг тооцож болохоор тоо юм. Бундеслигт дахиад 7 тойрог буюу 21 онооны төлөөх тоглолт үлдсэн. Өөрөөр хэлбэл, “Байер Леверкузен” дахиад гурав удаа хожиход л оноогоор гүйцэгдэх боломжгүй болно.
Үүнийг ч “Байерн Мюнхен”-ий дасгалжуулагч Томас Тухель хүлээн зөвшөөрч, өчигдөр хожигдсоныхоо дараагаар “Байер”-т баяр хүргэлээ. “Байер”-т баяр хүргэе. Бид өнөөдөр дайчин зүтгэлтэй тоглож чадсангүй. Эрч хүч ч сул байлаа. Бидний нүдэнд ялъя гэсэн оч харагдсангүй” хэмээн Томас Тухель өгүүлжээ.
“Байер”-ын аварга болох магадлалыг одоо 99.6 хувь гэж тооцож байна. Тэгвэл улирал эхлэхийн өмнө аварга болох магадлал нь ердөө 1 хувь л байсан юм.
1904 онд "Байер" клубыг үүсгэн байгуулснаас хойш 119 жилийн түүхэнд улсынхаа аваргаар тодорсон удаагүй. Харин таван удаа лигтээ аман хүзүүдэж байлаа. Тэгвэл мөдхөн түүхийн цоо шинэ ялалтын хуудсыг нээж, алтан үсгээр бичих болох нь ээ.
Сэтгэгдэл (0)
Сэтгэгдэл бичигдээгүй байна