Англи –Бельгийн нөхөрсөг тоглолт 2:2-оор өндөрлөсөн. Энэ тоглолтын шилдгээр Английн шигшээд дөнгөж хоёр дахиа тоглосон, гараанд бүр анх удаагаа гарсан 18 настай Кобби Майнү нэрлэгдсэн юм.
Тэрбээр Английн шигшээгийн эхний гоолын довтолгоог эхлүүлж, тоглолтын турш найдвартай, хараатай, эрч хүчтэй байж чадсан. “Манчестер Юнайтед”-ын академиас гарч ирж буй энэ залуу ирэх зун болох Европын АШТ-д оролцох ч найдлага байна. Бельгитэй хийсэн тоглолтын дараагаар түүнийг дасгалжуулагч Гарет Саутгэйт болон тоглолтын 2:2-оор тэнцсэн гоолыг 90+5 дахь минутад оруулсан Жүд Бэллингэм нар магтжээ.
“Дарамт дор орчихоор ямар байдгийг маш сайн мэдэх учир би гал дээр тос нэмэхийг хүсэхгүй байна. Өөрөөр хэлбэл, түүнийг хэт магтах дэмий байх. Гэхдээ өнөөдөр үнэхээр сайн байлаа. Үнэхээр гайхамшигтай залуу тоглогч юм. Энэ залууг маш сайхан ирээдүй хүлээж байгаа гэдэгт итгэлтэй байна. Зөвхөн “Манчестер Юнайтед”-д ч биш Английн шигшээгийн ирээдүй болсон тоглогч юм” хэмээн Бэллингэм өгүүлжээ.
Харин дасгалжуулагч Гарет Саутгэйт “Манай багт байгаагаас өөр шинж чанартай хөлбөмбөгч юм. Өнөөдөр яаж тоглохыг нь хараад сэтгэл дүүрэн байлаа. Ийм бага залуу хэрнээ ингэж тоглосон гэдэгт нь итгэхэд ч бэрх санагдана. Хүн бүр түүний авъяас, чанарыг олж харсан байх. Шахалт, прессинг дор бөмбөгийг хэрхэн тайван, итгэлтэй авч, нэгийн эсрэг хүчний тулаанд сайн тэмцэж, жижигхэн зайд бөмбөгтэй хэрхэн харилцаж буйг нь бүгд харсан биз ээ” хэмээн Саутгэйт өгүүлжээ.
Сэтгэгдэл (0)
Сэтгэгдэл бичигдээгүй байна