БНАСАУ буюу Ардчилсан Солонгосын шигшээ баг 2010 оны Дэлхийн Аварга Шалгаруулах Тэмцээнд оролцох эрхээ авч, бэлтгэлдээ оржээ. 44 жилийн дараагаар буюу 1966 онд шуугиулснаасаа хойш дахин хөлбөмбөгийн хамгийн том тэмцээнд очих гэж буй тул бэлтгэл чамбай хийхээр шийдсэн байна.
Гэхдээ Ардчилсан Солонгос нийгмийн тогтолцооноосоо шалтгаалаад өөрөө хаалттай улс тул тэр бүрий улсын шигшээ юмуу клубтэй тоглох, бэлтгэл хийх боломж нь бас хаагдмал. Ингээд сүм хийд, шашин шүтлэгийн талаараа нэгэн холбоос олж, Бразилын гуравдугаар дивизионы “Атлетико Сорокаба” багтай нөхөрсөг тоглолт хийхээр тохирчээ.
“Атлетико Сорокаба”-гийнхныг нисэн очиход гадаад паспорт болон гар утсыг нь хураан авсан байна. Ийм хүлээн авалт байдаг гэж мэдэхгүй тул зарим нь эгдүүцсэн л биз. Ингээд тоглолт ч болжээ. Тэгтэл Ким Ир Сений нэрэмжит стадионд 80 мянган үзэгч цуглаж, стадион пиг дүүрэн байна гэнэ. Гуравдугаар дивизионы багийн тоглолтыг яагаад ингэж их олон хүн үздэг билээ гээд стадионы самбарыг хартал тэнд PRK – BRA гэсэн бичиг асч байх ажээ. Тэгэхэд л “Атлетико Сорокаба”-гийнхан гуравдугаар дивизионыхон биш харин Дэлхийн таван удаагийн аваргууд буюу Бразилын шигшээгийнхний дүрд хувирснаа ойлгосон байна.
Тоглолт сонирхолтой сайхан болсон ч 0:0-ээр хоёр баг тэнцжээ. Дэлхийн таван удаагийн аваргуудтай тэнцсэнд солонгосчууд баяртай байсан нь дамжиггүй. Мөн Ардчилсан Солонгосын шигшээтэй тэнцсэндээ ч гуравдугаар дивизионы хөлбөмбөгчид олзуурхсан биз ээ.
Сэтгэгдэл (0)
Сэтгэгдэл бичигдээгүй байна