Английн Премьер лигийн түүхэнд “Эвертон”-оос бүтэн 10 оноо хассан нь санхүүгийн зөрчлийн улмаас хамгийн олон оноо хассан явдал болсон. Гэвч дахин хянаж үзээд 6 оноо болгож бууруулсан.
Мөн “Ноттингэм Форэст”-оос санхүүгийн зөрчил хэмээн 4 оноо хассан. Энэ нь байж болох алдагдлын хэмжээг хэтрүүлсэн буюу санхүүгийн фэйр-плейг зөрчсөн гэж үзсэн шийтгэлүүд юм.
Гэтэл эдүгээгээс яг жилийн өмнө “Манчестер Сити” санхүүгийн 115 зөрчил гаргасан тухай шуугиан дэгдсэн ч одоо хүртэл ямар ч шийтгэл ногдуулаагүй байна.
“Эвертон”, “Ноттингэм Форэст”-ийн хэргийг маш хурдан хянан хэлэлцэж, шийтгэл ногдуулсан хэрнээ “Манчестер Сити” дээр удаж буй нь олны дургүйцлийг төрүүлж, алагчилж буй мэт ойлгогдох болсон.
“Манчестер Сити” 2009-2018 онд санхүүгийн фэйр-плейг удаа дараалан зөрчсөн гэдгээ хүлээн зөвшөөрөөгүй тул Премьер лигийн зүгээс Хараат бус хороонд энэ хэргийг дахин хянан шалгахаар даалгасан юм.
115 буюу маш олон зөрчил тул тэр бүрийг шалгаж, магадлахад багагүй хугацаа шаардагдаж байгаа гэж мэдээлсэн. Тэгвэл хэвлэлүүдийн мэдээлснээр бол “Манчестер Сити”-гийн санхүүгийн зөрчлүүдийг ирэх намар буюу 2024/25 оны улирал эхэлсний дараагаар шүүн хэлэлцэж эхлэх гэнэ. Шүүн хэлэлцэх хугацаа сунжирсаар 2024/25 оны улирлын сүүлчээр шийдвэр гаргах магадлал өндөр ажээ. Энэ үед Пеп Гвардиолагийн “Манчестер Сити”-тэй байгуулсан гэрээ ч дуусгавар болж таарна. Гэхдээ мэдээж, гэрээг сунгах боломж бий.
Сэтгэгдэл (0)
Сэтгэгдэл бичигдээгүй байна