БНСУ-Д 1396 МОНГОЛ ИРГЭН ХЭРЭГТ ХОЛБОГДСОНЫ 70 ГАРУЙ ХУВЬ НЬ 4 ТӨРЛИЙН ХЭРЭГ ҮЙЛДЖЭЭ

Монголчууд биднээс хамгийн олон хүн амьдран сууж, ажил хөдөлмөр эрхэлдэг улс бол БНСУ. Сайн муу ээлжилдэг л учир тус улсад оршин сууж буй монгол иргэд гэмт хэрэг, зөрчилд цөөнгүй холбогддог.

Өнгөрсөн 2025 оны байдлаар Монгол Улсын 1396 иргэн БНСУ-д гэмт хэрэг, зөрчилд холбогдсон тоо баримт байна. БНСУ-д суугаа монгол иргэдийн өдүүлсэн гэмт хэргийн 70 орчим хувийг зөвхөн 4 төрлийн гэмт хэрэг эзэлж байна.

Тухайлбал,

• танхайрах, бусдын биед гэмтэл учруулах төрлийн гэмт хэрэг нийт гэмт хэргийн 30 хувийг,
• зам тээврийн осол, жолоочийн эрхийн үнэмлэхгүй автомашин жолоодох, жолооны үнэмлэхний ангилал зөрчих, согтуугаар тээврийн хэрэгсэл жолоодохтой холбоотой гэмт хэрэг 24.7 хувийг
• хулгайн гэмт хэрэг 12.3 хувийг
• Залилах төрлийн гэмт хэрэг 7.6 хувийг тус тус эзэлжээ.

Мөн нийт гэмт хэргийн 2.6 хувь нь хүчингийн хэрэг, 0.4 хувь нь хар тамхитай холбоотой хэрэг байгаа юм.

Үүнээс шалтгаалан олон залуус хүний газар хорих ял эдэлж байгаа бөгөөд эдгээр төрлийн гэмт хэргээс урьдчилан сэргийлэх шаардлагатай байна.

БНСУ-д бүртгэгдэж буй Монгол Улсын иргэдтэй холбоотой нийт гэмт хэргийн 30 гаруй хувь нь танхайрах төрлийн гэмт хэрэг байгаа юм. Энэ нь харилцан зодолдох, бусдын биед халдах, гэмтэл учруулах, нийтийн өмчид халдах, олон нийтийн амгалан байдал алдагдуулах зэрэг хэлбэрээр үйлдэгдэж байгаа аж. Мөн архи согтууруулах ундааны хэрэглээнээс үүдэлтэйгээр энэ төрлийн гэмт хэрэгт холбогдох тохиолдол цөөнгүй байна.

Оршин суугаа орныхоо хууль, дүрмийг чандлан сахиж, олон нийтийн газар биеэ зөв, боловсон авч явах, танихгүй хүний, ялангуяа, эмэгтэй хүний биед зөвшөөрөлгүй хүрэхгүй байхыг онцлон анхаарах хэрэгтэй аж.

Зан заншилтай холбоотойгоор “хөл дээр гишгээд гар барих”, “зөрөхдөө бусдын биед хүрч анхааруулах” зэргээр бусдын биед хүрэх үйлдэл нь зарим улс оронд гэмт хэргийн шинжтэй үйлдэл болдог гэдгийг санахад илүүдэхгүй.