Индонезийн нийслэл Жакарта хотноо хуралдсан ЮНЕСКО-ийн “Дэлхийн дурсамж” хөтөлбөрийн Ази, Номхон далайн бүсийн хорооны 11 дүгээр Ерөнхий чуулганаар 2026 оны 11 дүгээр сарын 5-ны өдөр “Г.Занабазарын нэрэмжит Дүрслэх урлагийн музейд хадгалагдаж буй Бурхан багшийн шүтээн зурагт намтар”-ыг ЮНЕСКО-ийн соёлын үнэт өв болгон бүртгэлээ.
Монгол улсаас нэр дэвшүүлсэн энэхүү өвийг Г.Занабазарын нэрэмжит Дүрслэх урлагийн музейн захирал, доктор П.Байгалмаа, музейн зөвлөх О.Батсайхан болон ЮНЕСКО-ийн Монголын үндэсний комиссын ажилтан О.Дэлгэрцэцэг нар ЮНЕСКО-ийн “Дэлхийн дурсамж” хөтөлбөрийн Ази, Номхон далайн бүсийн хорооны 11 дүгээр Ерөнхий чуулганд танилцуулж ийнхүү амжилттай хамгаалж Гэрчилгээг гардан авлаа.
Тус Ерөнхий чуулганд Ази, Номхон далайн бүсийн 26 орны 28 баримтат өвийг нэр дэвшүүлснээс 21 өвийг хэлэлцэж баталлаа.
Бурхан багшийн шүтээн зурагт намтар нь 19-р зууны түүх, соёлын үнэт дурсгалт бүтээлд бурхан багшийн намтрыг 34 зураг болгож зурсан төдийгүй хүн төрөлхтний ёс зүй, дэлхийн их соёл болсон үнэт сургаалыг дүрсэлсэн байдаг. Буддын шашинтай улс орнуудад бурхан багшийн тухай шүтээн зураг байдаг ч харин зургаар үзүүлсэн 34 намтар цуврал зураг нэн ховор юм.
“Г.Занабазарын нэрэмжит Дүрслэх урлагийн музейд хадгалагдаж буй Бурхан багшийн шүтээн зурагт намтар” гэх албан ёсны нэртэй уг бүтээл нь 28х22 см хэмжээтэй цаасан дээр шороон будгаар зурсан. Нэр нь үл мэдэгдэх XIX зууны Монголын бурханч лам тус бүтээлдээ намтрыг уран сайхны аргаар илэрхийлэхдээ бурхан багш урьд өмнө нь олон дүрд хувилан ёс зүй, үнэнч байдал, энэрэнгүй сэтгэл, ёс суртахууныг эрхэмлэх, зөв сэтгэлийг бий болгож байсан түүхийг өгүүлсэн бүтээл юм.
Г.Занабазарын нэрэмжит Дүрслэх урлагийн музейн түүхт 60 жилийн ой энэ онд тохиож байна. Тус музейн бүтээл нь Монголын музейнүүдээс анх удаа баримтат өвийн төрөлд ийнхүү нэр дэвшигдэж ЮНЕСКО-ийн өв болж байгаа нь Монголын дүрслэх урлагийн түүхэнд тэмдэглэгдэх үйл явдал бөгөөд музейн салбарын үе үеийн ажилтан, албан хаагчид болон соёлын өвийг хадгалан хамгаалагч эрдэмтэн судлаачдын гавьяа зүтгэлийн бодит үр дүн юм.
Сэтгэгдэл (0)
Сэтгэгдэл бичигдээгүй байна