Тираннозаврын (Tyrannosaurus rex) жижиг хувилбар мэт харагдах нэгэн үлэг гүрвэлийн чулуужсан араг яс 47.3 сая ам.доллар гэсэн гайхалтай өндөр үнээр зарагдаж, олны анхаарлыг татлаа.
Нанотираннус (Nanotyrannus) хэмээх энэ үлэг гүрвэл нь том биетэй Tираннозаврын өсөж гүйцээгүй бодгаль бус, түүнтэй төрөл садны холбоотой боловч бие даасан төрөл болохыг саяхан тогтоожээ.
Уг ховор олдворыг аравдугаар сарын 27-ны мягмар гарагт Нью-Йорк хотод болсон дуудлага худалдаагаар нэрийг нь нийтэд зарлаагүй худалдан авагч авсан байна. Араг ясыг 6–9 сая ам.доллароор зарагдана гэж урьдчилан тооцож байсан ч үүнээс хамаагүй илүү үнэд хүрчээ.
“Жоди” хэмээн нэрлэсэн уг олдвор нь дуудлага худалдаагаар зарагдсан үлэг гүрвэлийн араг яснуудаас үнийн дүнгээр хоёрдугаарт орж байна. Энэ оны зун Sotheby’s-ийн дуудлага худалдаагаар "Gus" нэртэй Тираннозаврын араг яс 50.1 сая ам.доллароор зарагдаж, дээд амжилт тогтоосон юм.
Жодигийн шинэ эзэн хэн болох нь одоогоор тодорхойгүй хэвээр байна. Sotheby’s-ийн мэдээлснээр, 12 орчим минут үргэлжилсэн шууд дуудлага худалдааны үеэр худалдан авах эрхийг авсан оролцогч бусад таван оролцогчтой цахимаар болон утсаар үнийн саналаар өрсөлджээ.
Одоогоос 67 сая орчим жилийн өмнө Цэрдийн галавын үед амьдарч байсан Нанотираннус нь Tираннозавртай нэг орчинд зэрэгцэн оршиж байв. Биеийн урт нь нас бие гүйцсэн Tираннозаврын уртын тал орчим байсан ч урд мөч, хумс нь илүү том, нарийхан бөгөөд хутганы ир мэт хэлбэртэй шүд зэрэг хэд хэдэн онцлог шинжээрээ ялгардаг байжээ.
BBC-гийн мэдээлснээр Sotheby's “Жоди”-г олон нийтэд дэлгэн үзүүлэхэд тохиромжтой, өндөр чанартай чулуужсан олдвор хэмээн тодорхойлжээ. Уг араг яс нь чулуужсан ясны 191 орчим бүрдэл хэсэгтэй бөгөөд гавлын яс нь бараг бүтнээрээ, маш сайн хадгалагдан үлдсэн байна.
Дуудлага худалдааны байгууллагын мэдээлснээр ийм төрлийн Нанотираннусын ердөө гурван араг яс одоогоор шинжлэх ухаанд мэдэгдээд байна. АНУ-ын судлаачид Нанотираннусыг бие даасан төрөл болохыг тогтоосноос хойш дуудлага худалдаанд оруулсан анхны Нанотираннусын араг яс нь Жоди болжээ.
Associated Press агентлагийн мэдээлснээр, 2019 онд Монтана муж дахь өөрийн эзэмшлийн газраас үлэг гүрвэлийн үлдэгдлийг олсон мал аж ахуй эрхлэгч Жоди Пирсоныг хүндэтгэн уг чулуужсан олдворт түүний нэрийг өгсөн аж.
Сэтгэгдэл (0)
Сэтгэгдэл бичигдээгүй байна