Монгол Улсын дээд шүүхийн нийт шүүгчийн хуралдаан өчигдөр /2026.04.12/ болж, хэд хэдэн асуудал хэлэлцэж шийдвэрлэжээ.
Хуралдаанаас Улсын дээд шүүхэд шинээр томилогдсон шүүгч Т.Өсөхбаярыг Эрүүгийн хэргийн танхимд хуваарилсан байна.
Мөн Улсын дээд шүүхийн танхимын бүрэлдэхүүний шүүгчдийг тогтоох тухай нийт шүүгчийн хуралдааны 2021 оны 4 дүгээр сарын 12-ны өдрийн 07 дугаар тогтоолын 1 дүгээр хавсралтад өөрчлөлт оруулснаар Эрүүгийн хэргийн танхим ес, Иргэн болон Захиргааны хэргийн танхим тус бүр найман шүүгчтэй байхаар тогтжээ.
2021 оны 4 дүгээр сарын 12-ны өдрийн нийт шүүгчийн хуралдаанаар Дээд шүүхийн танхимын бүрэлдэхүүнийг батлах асуудлыг хэлэлцээд Захиргааны хэргийн танхим 7, Иргэний хэргийн танхим 10, Эрүүгийн хэргийн танхим 8 шүүгчийн бүрэлдэхүүнтэй ажиллахаар тогтсон байдаг. Улсын Дээд шүүхийн Иргэний хэргийн танхимын шүүх бүрэлдэхүүн тухайн үед тодорхой хугацаанд хүрэлцээгүйн улмаас 2300 орчим иргэний хэрэг шийдвэрлэгдэхгүй хуримтлагдаж, хэргийн оролцогчийн эрх ашиг зөрчигдөх нөхцөл байдал үүссэнийг харгалзан тус танхимыг хоёр шүүх бүрэлдэхүүн зэрэг ажиллах боломжийг хангахаар зорилгоор дээрх бүрэлдэхүүний тоог тогтоож байсан юм.
Ерөнхий шүүгч ч танхимын бүрэлдэхүүнд багтдаг бөгөөд 2026 оны зургаадугаар сарын 2-ны өдөр бүрэн эрхийн хугацаа нь дууссан Д.Ганзориг Эрүүгийн хэргийн танхимын бүрэлдэхүүнд багтаж байсан. Иймд Т.Өсөхбаярыг тус танхимд хуваарилснаар Эрүүгийн хэргийн танхим 9 шүүгчийн бүрэлдэхүүнтэй ажиллах болж байна.
Одоогоор Улсын дээд шүүхийн Ерөнхий шүүгчийн үүргийг Эрүүгийн хэргийн танхимын тэргүүн Ч.Хосбаяр түр орлон гүйцэтгэж байгаа юм. Тус шүүхийн Шүүгчдийн зөвлөгөөний 2026 оны зургаадугаар сарын 3-ны өдрийн хуралдаанаас шүүгч Цэндийн Цогтыг Ерөнхий шүүгчид нэр дэвшүүлсэн бөгөөд хуулийн дагуу Ерөнхийлөгч уг асуудлыг 14 хоногийн хугацаанд шийдвэрлэх зохицуулалттай.
Улсын дээд шүүх өдгөө 22 шүүгчтэй шүүн таслах үйл ажиллагаа явуулж байгаа бөгөөд Эрүүгийн хэргийн танхимын 9 шүүгч бүрдсэн бол Иргэн, Захиргааны хэргийн танхимын шүүгчид бүрэлдэхүүн дутуу ажиллаж байна.
Сэтгэгдэл (0)
Сэтгэгдэл бичигдээгүй байна