МИАТ ТӨХК энэ сарын 15-17-нд Сүхбаатарын талбайд зохион байгуулсан Зам тээврийн яамны “Нээлттэй хаалганы өдөрлөг”-ийн хүрээнд үйл ажиллагаагаа сурталчлан таниулахын зэрэгцээ иргэдийн асуултад хариулж, санал хүсэлтийг хүлээн авч ажиллажээ. Мөн төв талбайд нислэгийн тийз бичих үйлчилгээг хэрэглэгчдэд шууд хүргэж, маршрут, үнэ тарифын мэдээллийг өгсөн юм.
Б.ЭНХБАТ:ИРГЭД НИСЛЭГИЙН МАРШРУТ, АЖЛЫН БАЙРНЫ МЭДЭЭЛЭЛ АСУУСАН
МИАТ компаниас иргэд ямар мэдээллийг түлхүү сонирхож байгааг Бойнг-737800 агаарын хөлгийн сурагч нисгэгч Б.Энхбатаас тодруулсан юм.
Б.Энхбат “Эхний өдөр нисгэгч, бүхээгийн ажилтан мэргэжлээр их, дээд сургууль төгсөгчид болон энэ мэргэжлээр элсэн суралцах хүсэлтэй өсвөр үе, залуус эрүүл мэнд, хэлний түвшингийн талаар түлхүү сонирхож мэдээлэл авсан. МИАТ компани орон нутагт болон олон улсад нислэг үйлдэхээс гадна агаарын хөлгийн засвар үйлчилгээ, газрын үйл ажиллагааг амжилттай явуулж ирсэн. Тиймээс ШУТИС-ийн инженерийн ангийн төгсөх ангийн оюутнууд, шинэ төгсөгчид ажлын байрны сонгон шалгаруулалтын талаар мэдээлэл, зөвлөгөө авч байна. Аялал жуулчлалын улирал эхэлсэнтэй холбоотойгоор иргэд, мөн жуулчид олноор хандсан тул Монголоор дамжин нисэх чартер нислэгийн мэдээлэл, маршрут, тийзийн үнэ тарифын мэдээллийг өгч ажиллалаа.” гэв.
Б.БОЛОР-ЭРДЭНЭ: ЗТЯ-НЫ ҮҮД ИРГЭД, ОЛОН НИЙТЭД ҮРГЭЛЖ НЭЭЛТТЭЙ БАЙНА
“Нээлттэй хаалганы өдөрлөг”-ийн хаалтын ёслолд Зам, тээврийн яамны Төрийн захиргааны удирдлагын газрын дарга Б.Болор-Эрдэнэ үг хэлсэн юм.
Тэрбээр “Монгол Улсын Засгийн газраас зарласан “Чөлөөлье” аяны хүрээнд зам тээврийн салбарынхан хэрэгжүүлж буй бодлого,томоохон төсөл хөтөлбөрүүдийн явцын талаар иргэд, олон нийтэд нээлттэй мэдээлэл хүргэлээ. Иргэд, хэрэглэгчдэд үзүүлж буй үйлчилгээгээ хэрхэн хөнгөрүүлж, хүндрэлгүй, ил тод, хүртээмжтэй хүргэж байгаа талаарх мэдээллүүдээ цогцоор нь өглөө.
Иргэний нисэхийн ерөнхий газар (ИНЕГ), Төмөр замын газар, Автотээврийн үндэсний төв (АТҮТ) ТӨҮГ, Монгол Улсын Далайн захиргааны газар,"Монголын төмөр зам" (МТЗ) ТӨХК, "Улаанбаатар төмөр зам" (УБТЗ) ХНН, "Тавантолгой төмөр зам" (ТТЗ) ХХК, "МИАТ" ТӨХК, "Иргэний нисэхийн үндэсний төв" зэрэг манай 22 байгууллагын ажилтан, алба хаагчид иргэдэд нээлттэй мэдээлэл хүргэхийн зэрэгцээ санал, гомдлыг хүлээн авч шийдвэрлэж, нийт 100 гаруй үйлчилгээг иргэдэд хүргэлээ. Хялбаршуулсан, давхцал хүндрэлийг арилгасан, байхгүй болгож цуцалсан үйлчилгээнүүдийн мэдээллийг шуурхай өгснөөрөө онцлог байлаа. Нирйслэлийн иргэд энэхүү “Нээлттэй хаалганы өдөрлөг”-т маш идэвхтэй оролцсонд талархал илэрхийлье. Үүгээр бидний үйл ажиллагаа дуусахгүй, цаашид ЗТЯ-ны үүд хаалга иргэддээ үргэлж нээлттэй байх болно. Бид үйл ажиллагаагаа улам хялбаршуулна, цахимжуулна, хүртээмжийг нэмэгдүүлнэ, ил тод нээлттэй хүргэнэ гэсэн зорилт тавин ажиллаж байна” гэсэн юм.
Сэтгэгдэл (0)
Сэтгэгдэл бичигдээгүй байна