Дэлхийн олон орны хэрэглэгчид Meta компанийн түгээмэл үйлчилгээнүүдэд нэвтрэхэд асуудал гарч, түр хугацаанд үйл ажиллагаа нь доголдов.
Энэхүү саатал нь компанийн хэд хэдэн платформыг зэрэг хамарсан бөгөөд хэрэглэгчид Facebook, Instagram болон Messenger үйлчилгээнүүдэд нэвтэрч чадахгүй байсан юм.
Facebook-ийн мэдээний урсгал буюу news feed ачаалагдахгүй, бүртгэлдээ нэвтрэх үед алдаа зааж байгаа эсвэл огт нээгдэхгүй, зарим хэрэглэгчид өөрсдийн бүртгэлээс санамсаргүйгээр гарсан тухай мэдээлжээ.
Messenger-т ч мөн адил асуудал үүсэж, хэрэглэгчид зурвас илгээх, хүлээн авах боломжгүй болсон байна. .
Instagram дээр ч мөн доголдол бүртгэгджээ.
Дэлхийн янз бүрийн бүс нутгийн хэрэглэгчид эдгээр асуудлын талаар мэдээлсэн бөгөөд сүлжээний саатлыг хянадаг тусгай платформууд дээр богино хугацаанд Meta-ийн платформуудтай холбоотой мянга мянган гомдол ирсэн гэнэ.
Эхэндээ олон хэрэглэгч асуудал өөрсдийн төхөөрөмж эсвэл бүртгэлтэй холбоотой гэж бодсон байна. Гэвч нэгэн зэрэг маш олон гомдол ирсэн нь энэхүү доголдол дэлхий даяар нөлөөлснийг харуулсан юм.
Meta компани уг асуудлын шалтгааны талаар албан ёсны тайлбар одоогоор хийгээгүй байна. Meta компанийн сервер эсвэл дэд бүтцийн түвшний техникийн саатал байж болзошгүй гэсэн мэдээлэл гарч байна.
Сэтгэгдэл (0)
Сэтгэгдэл бичигдээгүй байна