Орон сууцны үнийн индекс 2026 оны тавдугаар сард 1.40 болж, өмнөх оны мөн үеэс 6.3 хувиар өсөж, өмнөх сараас 1.6 хувиар буурчээ.
Шинэ орон сууцны үнэ өмнөх оны мөн үетэй харьцуулахад 6.1 хувиар, хуучин орон сууцны үнэ 6.4 хувиар тус тус өссөн бол өмнөх сартай харьцуулахад шинэ орон сууцны үнэ 0.1 хувиар, хуучин орон сууцны үнэ 2.2 хувиар буурсан байна.
2026 оны 5 дугаар сард шинэ орон сууцны 1 метр квадрат талбайн дундаж үнэ 4.71 сая төгрөг болж, Сүхбаатар дүүрэгт хамгийн өндөр буюу 5.71 сая төгрөгийн үнэтэй байна. Шинэ орон сууцны дундаж үнэ өмнөх оны мөн үетэй харьцуулахад Баянзүрх дүүрэгт 11.6 хувь (473.6 мянган төгрөг)-иар өсөж, Чингэлтэй дүүрэгт 8.5 хувь (372.8 мянган төгрөг)-иар буурчээ. Харин хуучин орон сууцны 1 метр квадрат талбайн дундаж үнэ 4.84 сая төгрөг болж, Сүхбаатар дүүрэгт хамгийн өндөр буюу 5.95 сая төгрөгийн үнэтэй байв. Хуучин орон сууцны дундаж үнэ өмнөх оны мөн үетэй харьцуулахад Баянзүрх дүүрэгт 9.6 хувь (392.3 мянган төгрөг)-иар өссөн байна.
Орон сууцны 1м.кв талбайн дундаж үнийг байршлаар нь харвал Сүхбаатар дүүрэгт Сүхбаатарын талбай, 220 мянгат орчим 8.58 сая төгрөг байгаа нь хамгийн өндөр, Сонгинохайрхан дүүрэгт 5 шар орчим 3.04 сая төгрөг байгаа нь хамгийн хямд байгаа юм.
Туршилт тооцоогоор 2026 оны 5 дугаар сард 1 өрөө орон сууцны 1 сарын түрээсийн дундаж үнэ 1.28 сая төгрөг, 2 өрөө орон сууцны түрээсийн дундаж үнэ 1.81 сая төгрөг, 3 өрөө орон сууцны түрээсийн дундаж үнэ 2.94 сая төгрөг байна. Орон сууцны 1 сарын түрээсийн дундаж үнийг байршлаар нь харвал, 1-3 өрөө байр Сүхбаатар дүүрэгт Сүхбаатарын талбай, 220 мянгат орчим 1.88-4.79 сая төгрөг байгаа нь хамгийн өндөр, Сонгинохайрхан дүүрэгт 5 шар орчим 0.97-1.33 сая төгрөг байгаа нь хамгийн хямд байгаа юм.
Сэтгэгдэл (0)
Сэтгэгдэл бичигдээгүй байна