Монголын циркийн урлагийн нэрийн хуудас болсон уран нугаралтын урлагийг дээдлэн хөгжүүлэх, өвлүүлэн үлдээх зорилготой “УЯН – Монголын уран нугаралтын чуулга уулзалт-2026” Налайх дүүрэгт гурван өдрийн турш зохион байгуулагдаж, 200 гаруй уран нугараач оролцжээ.
Монголчууд үеийн үед авьяас билэг, ур ухаан, тэсвэр хатуужлаа урлагаар дамжуулан дэлхийд таниулж ирсний нэг тод илэрхийлэл нь уран нугаралт бөгөөд энэ урлаг нь хүний биеийн гайхамшигт боломж, гоо зүйн төгс илэрхийлэл төдийгүй монгол хүний хөдөлмөрч зан чанар, сахилга бат, тууштай тэмүүллийн бэлгэдэл болдог юм.
Монгол Улсын Гавьяат жүжигчин, Налайх дүүргийн Хүндэт иргэн Э.Лхагва-Очирын санаачилгаар зохион байгуулагдсан энэхүү чуулга уулзалт нь зөвхөн туршлага солилцох арга хэмжээ бус, монгол өв соёлоо дэлхий дахинд таниулах, шинэ үеийн авьяастнуудыг дэмжих, олон улсын хамтын ажиллагааг өргөжүүлэх чухал индэр болж чаджээ.
Түүнчлэн “Physical Asia” шоуны Австрали, Филиппиний багийн гишүүд энэхүү үйл ажиллагаанд нэгдсэн нь Монголын уран нугаралтын үнэ цэнэ, гайхамшгийг дэлхийд дахин таниулсан ач холбогдолтой үйл явдал болсон байна.
Өнөөдөр Монголын уран нугаралтын урлаг дэлхийн олон орны тайзнаа үнэлэгдэж, олон улсын циркийн урлагийн хөгжлийн салшгүй хэсэг болсон бөгөөд Монголын уран нугараачид дэлхийн 50 гаруй оронд тоглолтоо үзүүлж, олон улсын циркийн наадмуудаас 100 гаруй алт, мөнгө, хүрэл медаль хүртээд байгаа юм.
Сэтгэгдэл (0)
Сэтгэгдэл бичигдээгүй байна