Монгол Улсын дээд шүүхийн нийт шүүгчийн 2026 оны зургаадугаар сарын 19-ний өдрийн хуралдаанаар Сонгуулийн ерөнхий хорооны гишүүнд нэр дэвшүүлэх асуудлыг хэлэлцжээ.
Нэр дэвшүүлэх материал хүлээн авах хугацаанд Сонгуулийн ерөнхий хорооны Улс төрийн намын мэдээлэл, арга зүйн газрын дарга Д.Баяндүүрэн, Улсын Их Хурлын Тамгын газрын Хуулийн газрын зөвлөх Б.Баярсайхан, Говь-Алтай аймгийн Засаг даргын Тамгын газрын ахлах мэргэжилтэн Х.Лхагважав нарын хүмүүс материал ирүүлсэн байна.
Х.Лхагважавын баримт бичгийн бүрдүүлэлт хангагдаагүй үндэслэлээр санал хураалтаас хассан бөгөөд үлдсэн 2 нэр дэвшигч дээр санал хураахад Д.Баяндүүрэн нийт шүүгчийн олонхын санал авчээ.
Ийнхүү Д.Баяндүүрэнг Сонгуулийн ерөнхий хорооны гишүүнд нэр дэвшүүлж, Улсын Их Хуралд санал болгохоор тогтсон байна.
Дашрамд дурдахад Улсын дээд шүүхээс Сонгуулийн ерөнхий хорооны гишүүний 2 орон тоонд нэр дэвшүүлэхээр заасан байдаг бөгөөд өмнө нь Дээд шүүхийн Тамгын газрын дарга С.Заяадэлгэр, Шүүхийн сахилгын хорооны Ажлын албаны дарга Д.Мөнхзориг нар нэрээ дэвшүүлсэн байдаг.
Дээд шүүхийн нийт шүүгчийн 2026 оны тавдугаар сарын 18-ны өдрийн хуралдаанаас Д.Мөнхзоригийг Сонгуулийн ерөнхий хорооны гишүүнд нэр дэвшүүлсэн ч Тамгын газрын дарга С.Заяадэлгэрээ дэмжээгүй юм.
УИХ Сонгуулийн ерөнхий хорооны гишүүдийг томилоод байгаа бөгөөд Дээд шүүхээс санал болгох 1 орон тоо дутуу байсан тул яаралтай горимоор нэр дэвшигчээ тодруулсан нь Сонгуулийн ерөнхий хороонд олон жил ажилласан Д.Баяндүүрэн байлаа.
Сэтгэгдэл (0)
Сэтгэгдэл бичигдээгүй байна