С.БААТАРЖАВЫГ ТӨРИЙН НАРИЙН БИЧГИЙН ДАРГЫН АЛБАН ҮҮРГИЙГ ТҮР ОРЛОН ГҮЙЦЭТГЭГЧЭЭР ТОМИЛЖЭЭ

Хууль зүй дотоод хэргийн сайдын шуурхай хуралдаан өнөөдөр /2026.10.20/ болж, яамны удирдлагын бүрэлдэхүүн, харьяа агентлаг, байгууллагын удирдлагууд оролцжээ.

Хуралдааны эхэнд Хууль зүй, дотоод хэргийн яамны удирдах албан тушаалтны шинэ томилгоог танилцуулсан байна. 

Хууль зүй, дотоод хэргийн яамны төрийн нарийн бичгийн даргын албан үүргийг түр орлон гүйцэтгэгчээр Сайннямбуугийн Баатаржав,  Төрийн захиргааны удирдлагын газрын даргаар Одгэрэлийн Цолмон, Санхүү, хөрөнгө оруулалтын газрын даргаар Норовын Алтансүх, Хяналт шалгалт, дотоод аудитын газрын даргаарАюурзанын Энх-Эрдэнийг томилжээ. Мөн Монгол Улсын гавьяат хуульч Намжилын Чинбатыг Хууль зүй, дотоод хэргийн сайдын зөвлөхөөр, Хууль зүйн ухааны доктор Батболдын Амарсанааг сайдын орон тооны бус зөвлөхөөр тус тус томилсныг танилцуулав. 

Хууль зүй, дотоод хэргийн сайд Г.Тэмүүлэн төрийн албан хаагчийг ажилд авах, томилох, чөлөөлөх, албан тушаал дэвшүүлэх, шагнаж урамшуулахдаа улс төрийн хамаарал, танил тал бус тухайн хүний мэдлэг, боловсрол, мэргэжил, ур чадвар, ажлын туршлага, ажлын гүйцэтгэлийн үр дүнг үндсэн шалгуур болгож төрийн албанд мерит зарчмыг баримтлан ажиллахаа онцолжээ. 

Хурлын үеэр Хууль зүй, дотоод хэргийн яамны харьяа агентлаг, байгууллагуудын үйл ажиллагаатай танилцаж, тулгамдаж буй асуудлыг шийдвэрлэх чиглэлээр үүрэг өглөө. 

Тухайлбал:  

1.Цэргийн алба хаагчдын сахилга, хариуцлага, албаны аюулгүй байдалд онцгойлон анхаарч, шинэ дайчдын анхан шатны сургалтыг хууль дүрэмд заасны дагуу зохион байгуулахыг Хил хамгаалах ерөнхий газар, Цагдаагийн ерөнхий газар, Шүүхийн шийдвэр гүйцэтгэх ерөнхий газар, Дотоод хэргийн их сургуульд үүрэг болголоо.

2.Улсын Онцгой комиссын 03 дугаар хуралдааны тэмдэглэл, Хууль зүй, дотоод хэргийн сайдын 05 дугаар албан даалгаврын хэрэгжилтийг хангаж, суурьшлын бүсэд баавгай илэрсэн болон түүнийг устгаж, аюулгүй болгосон талаарх мэдээ, мэдээллийн шуурхай байдлыг хангахыг Хил хамгаалах ерөнхий газар, Цагдаагийн ерөнхий газарт даалгалаа.

3.Улсын хилийн зурвас, бүсэд үйл ажиллагаа явуулж байгаа аж ахуйн нэгж, байгууллагуудын үйл ажиллагаанд хяналт тавин, тал хээрийн болон ойн түймрээс урьдчилан сэргийлэх санамж хүргүүлж, “Дэглэм-26” арга хэмжээний хэрэгжилтийг хангахыг Хил хамгаалах ерөнхий газарт үүрэг болголоо.

Түүнчлэн Хууль зүй, дотоод хэргийн яам болон харьяа агентлаг байгууллагуудын алба хаагчдын сахилга, хариуцлагыг дээшлүүлж, дэг журмыг сахиулах, хууль, ёс зүйн хэм хэмжээг мөрдөж, хүний эрхийг дээдэлж харилцаа хандлага, үйлчилгээний чанарт тавих дотоод хяналтыг сайжруулах, үр дүнг тооцож ажиллахыг үүрэг болгожээ.

.