Уран гулгалтын од Камила Валиева өнөөдөр /2026.01.31/ эхэлсэн ОХУ-ын Уран гулгалтын үсрэлтийн аварга шалгаруулах тэмцээний эхний үзүүлбэртээ дөрвөлсөн тулуп үсрэлт амжилттай гүйцэтгэлээ.
Шөвгийн наймын шатанд үзүүлсэн тоглолтынхоо үеэр Валиева дөрвөлсөн тулупаас гадна гурвалсан лутц–сальховын каскад, бага зэргийн алдаатай ганцаарчилсан гурвалсан лутц, мөн ганцаарчилсан гурвалсан флип үсрэлтийг гүйцэтгэжээ. Гүйцэтгэсэн үсрэлтүүдийн нийлбэр дүнгээр Камила Валиева 29.28 оноо авсан байна.
Энэ нь түүний завсарлага авснаас хойших анхны албан ёсны тэмцээн бөгөөд уг үзүүлбэрийнхээ дараа ярилцлага өгөхдөө Камила Валиева "Намайг дэмжиж, надад итгэж байсан бүх үзэгч, хөгжөөн дэмжигчдэд маш их баярлалаа гэж хэлмээр байна. Ингээд эцэст нь би энд ирлээ, дэмжлэг үзүүлсэнд маш их баярлалаа. Сэтгэгдэл үнэхээр гайхалтай байна, энэ хугацаанд миний амьдралд тохиолдсон хамгийн сайхан зүйл мэт санагдаж байна. Би энэ спортод, мөн энэ уур амьсгалд маш их хайртай" гэжээ.
19 настай Валиева 2025 оны аравдугаар сард бэлтгэлдээ эргэн орсон бөгөөд 2025 оны арванхоёрдугаар сарын 25-наас эхлэн тэмцээнд албан ёсоор оролцох эрхтэй болсон юм. Тэрбээр дасгалжуулагч Этери Тутберидзегийн багийг орхиж, цаашдын карьераа Светлана Соколовскаягийн багт үргэлжлүүлэхээр болсон билээ.
Шөвгийн наймын шатанд тамирчид хоёр ганцаарчилсан үсрэлт, нэг каскад гүйцэтгэх ёстой. Эдгээрийг гүйцэтгэхэд зарцуулах хугацаа нь 1 минут 15 секунд бөгөөд хамгийн өндөр оноо авсан зургаан тамирчин хагас шигшээд шалгарна.
Эхний үзүүлбэрийн дараах дүнгээр эдгээр 6 тамирчин хагас шигшээд шалгарчээ.
1. Алиса Двоеглазова — 34,49 (4T, 4Lz-3S, 3Lz).
2. Мария Захарова — 34,38 (4T-3S, 4T, 3Lz).
3. Дина Хуснутдинова — 30,21 (3A, 3Lz, 3A-3A).
4. Камила Валиева — 29.28 (4T, 3Lz-3S, 3Lz).
5. Дарья Садкова — 26,56 (4T, 3Lz, 3Lz-3S).
6. Софья Муравьёва — 26,18 (3Lz-3S, 3F, 3Lz).
Тус тэмцээнээр эргэн ирэлт хийж буй бас нэгэн алдарт тамирчин, 2022 оны Олимпын мөнгөн медальт уран гулгагч Александра Трусова шөвгийн наймын шатны үзүүлбэрээ тийм ч хангалттай хийж чадалгүй, 22.77 оноо авсан бөгөөд шилдэг зургаан тамирчны тоонд багтаж, хагас шигшээд шалгарч чадсангүй.
Трусова 2025 оны наймдугаар сард амаржиж хүү төрүүлсэн бөгөөд ийнхүү эргэн ирэлт хийх эхний оролдлого нь амжилт муутай боллоо.
Сэтгэгдэл (0)
Сэтгэгдэл бичигдээгүй байна