АНУ-ын Ерөнхийлөгч Дональд Трамп хөлбөмбөгийн алдарт од Криштиано Роналдог мягмар гарагт /2025.11.18/ Цагаан ордонд хүрэлцэн ирсэнд нь талархал илэрхийлж, одыг шүтэн биширдэг хүү нь түүнийг одоо бага ч гэсэн хүндлэх байх гэж хошигнон өгүүлжээ.
Трамп Саудын Арабтай хэлэлцээ байгуулах үеэр Роналдо оролцоогүй ч үдшийн зоогт эхнэрийн хамт хүрэлцэн ирсэн юм.
2023 оны эхээр Роналдо Саудын Арабын про лигийн нүүр царай болж, угсаа залгамжлагч хунтайж Мохаммед бин Салманы тэргүүлдэг үндэсний баялгийн сангийн эзэмшдэг Аль Наср хөлбөмбөгийн клубын ахлагч болсон. Роналдогийн Саудын Арабтай хийсэн гэрээ өндөр дүнтэй байсан бөгөөд жилд 200 сая доллар буюу өдөрт хагас сая гаруй долларын хөлс авч байсан юм.
Энэ оны зургадугаар сард тэр нийт 400 сая долларын үнийн дүнтэй хоёр жилийн гэрээ шинээр байгуулж, Bloomberg-ийн мэдээлснээр 1.4 тэрбум долларын хөрөнгөтэй анхны тэрбумтан хөлбөмбөгчин болсон.
Саудын Арабын угсаа залгамжлах хунтайж Бин Салманыг Роналдо сэтгүүлч, телевизийн хөтлөгч Пирс Морганы нэвтрүүлэгт оролцох үеэрээ “манай босс” гэж нэрлэсэн юм.
Трамп үдшийн зоогийн үеэр "Миний хүү Роналдогийн үнэнч шүтэн бишрэгч. Барронд би чамтай уулзсан гэж хэлвэл аавыгаа арай илүү хүндлэх байх. Тиймээс та хоёрт энд байгаад баярлалаа гэж хэлмээр байна” гэхэд цугларсан хүмүүс алга ташжээ. Баррон Трамп хөлбөмбөгийн үнэнч шүтэн бишрэгч гэдгээрээ алдартай юм.
"Криштиано ямар ч ажил, клуб нь хаана ч байсан шигшээ багаа, мөн Португалийн ард түмнийг төлөөлдөг" гэж Португалийн шигшээ багийн дасгалжуулагч Мартинес CNN Portugal-д ярьсан байна. Тиймээс бидний хувьд энэ бол сайн мэдээ бөгөөд Криштиано зөвхөн хөл бөмбөгт төдийгүй “элчин сайд”-ын хувьд олон зүйл хийж чадна гэдэгт би итгэж байна гэсэн байна.
Айлчлалын өмнө Роналдо Трамптай уулзах хүсэлтэй байгаагаа илэрхийлж байсан билээ. "Тэр бол миний уулзаж, ярилцахыг хүсдэг хүмүүсийн нэг" гэж Роналдо энэ сарын эхээр Пирс Морганы нэвтрүүлэгт оролцохдоо ярьсан юм. Мөн Трамп тэр хоёрын хэн нь алдартай болох талаар яригдахад “Би илүү алдартай, аль ч улсад хүмүүс намайг түүнээс илүү мэддэг. Дэлхий дээр надаас илүү алдартай хүн байхгүй” гэж итгэлтэй хариулсан билээ.
Сэтгэгдэл (0)
Сэтгэгдэл бичигдээгүй байна