ОХУ-ын уран гулгагч Аделия Петросян 2026 оны Өвлийн Олимпын наадмаас медаль хүртэх боломжийг Букмекерийн байгууллагууд үнэлсэн талаар Betonmobile мэдээлжээ.
Мэргэжилтнүүдийн үзэж байгаагаар Петросян медаль хүртэнэ гэдэгт тийм ч их итгэл хүлээлгэхгүй байгаа гэнэ. Тэрбээр гол өрсөлдөгчдийн жагсаалтын дөрөвдүгээр байрт бичигдэж байгаа бөгөөд Петросяны амжилт гаргах магадлалыг 3.8 коэффициентоор үнэлжээ.
Өвлийн олимпын алтан медалийн эзэн болох хамгийн найдвартай тамирчнаар Японы уран гулгагч Каори Сакамотог нэрлэж байгаа бөгөөд тэрбээр 2.2 коэффициентоор үнэлэгдэж байгаа аж. Түүний дараа АНУ-ын тамирчид болох Алиса Лью 3, Эмбер Гленн 3.3 коэффициентоор жагсаж байна.
Өвлийн олимпын эмэгтэй ганцаарчилсан уран гулгалтын тэмцээн хоёрдугаар сарын 17-нд эхэлнэ.
ОХУ-ын уран гулгалтын гурван удаагийн аварга Аделия Петросян 2025 оны есдүгээр сард Бээжинд болсон Олимпын эрх олгох тэмцээнд гэмтэлтэй оролцсон юм.
Тэрбээр энэ тухайгаа “Бид Красноярскт ирсэн. Бээжин рүү нисэхээс ойролцоогоор 4–5 хоногийн өмнөөс үсрэлтүүд маань аажмаар сайжирч эхэлсэн. Цаг маш бага байсан, үсрэлтүүд төгс биш байсан ч би удаан хугацааны дараа анх удаа хөлөө мэдэрч, түүгээрээ ажиллаж, хөдөлгөөнөө хянаж чадсан. Үүнээс өмнө гурван долоо хоногийн турш шагайнд асуудалтай байсан — гутал маш их дарж, хөл хавагнаад, хэвийн гулгаж чадахгүй, үсрэх боломжгүй байсан.
Би формдоо огт ороогүй, бараг л хөлгүй хүн шиг байсан юм. Аймшигтай их өвдөлттэй, өвдөлтөөс болоод үсрэлтээ огт мэдэрч чадахгүй байсан. Хөтөлбөрөө ч гүйцэд гулгаж чадах эсэхээ төсөөлж чадахгүй, байтугай үсэрнэ гэж бодох ч боломжгүй балаа. Гэхдээ азаар бүх зүйл сайхан болсон» — хэмээн Петросян «Тутберидзегийн арга» цувралд ярьсан юм.
18 настай Аделия Петросян нь 2025 оны есдүгээр сард Бээжинд болсон 2026 оны Олимпын эрх олгох тэмцээнд оролцох зөвшөөрөл авсан цорын ганц Оросын уран гулгагч байв. Энэхүү шалгаруулалтын тэмцээнд Аделия нэгдүгээр байр эзэлсэн нь түүнд 2026 оны Өвлийн олимпын наадамд ОХУ-ыг төлөөлөн оролцох эрхийг олгосон билээ.
Сэтгэгдэл (0)
Сэтгэгдэл бичигдээгүй байна