Туркийн лигт “Трабзонспор”-ыг 2:3-аар “Фенербахче” хожихдоо шүүгчийн сунгасан 12 дахь минутад ялалтын гоолоо оруулсан юм. Харин тэдний хаалганд хоёр гоолыг хоёуланг нь пенальтиас хийжээ.
Ингэснээр “Фенербахче” 10 тойргийн дараагаар 23 оноотойгоор лигийнхээ аман хүзүүнд гарч ирж, магнайд яваа “Галатасарай”-гаас 5 оноо дутуу байна. Тоглолтын дараагаар Жозе Моуриньо дуулиантай мэдэгдэл хийснийг хүргэе.
“Атилла Караогланыг өөрийн багийн тоглолтдоо дахин хармааргүй байна. Бид бүтэн тогтолцооны эсрэг тэмцэж байна. Талбай дээр залуухан шүүгч гарсан ч гэлээ түүний цаана түмэнд үл харагдах нэгэн VAR дээр байсан нь Атилла Караоглан байлаа.
“Фенербахче”-гийн нэрийг өмнөөс би энэ мэдэгдлийг хийе. Цаашид энэ хүнийг бид талбайн шүүгчээр, ялангуяа VAR-ийн шүүгчээр огт хармааргүй байна. Хүмүүс надад янз бүрийн л юм ярьж байсан. Гэвч би итгээгүй юм. Гэтэл байдал ярьснаас нь ч хамаагүй дор юм. Бид хүчтэй өрсөлдөгчийн эсрэг тоглохоос гадна мөн тогтолцооны эсрэг тэмцэх болж байна. Энэ бол маш хэцүү. Тиймээс би хожсондоо тэгж их баярласан юм. Бид өнөөдөр нөлөө бүхий хүмүүсийг дийлж гарлаа. Цаашид ч бууж өгөхгүй.
Үнэн бодит байдлын дөнгөж талыг нь хэлж намайг энд авчирсан хүмүүст дургүй хүрч байна. Хэрвээ энд ийм байдаг гээд хэлчихсэн бол би яалаа гэж наашаа ирэх билээ. Энэ тогтолцоо улам хүчтэй болвол миний үгс утаа шиг замхрах болно.
Брайт улаан хуудас авахаар алдаа гаргаагүй гэж үү? Тэгэхэд Караоглан юу хийж байсан юм бэ, кофе ууж суугаад хараагүй юу? Шүүгчийн заагаагүй хоёр пенальтийг Караоглан манай хаалганд үл үзэгдэгчийн дүрээр заасан. Одоо энэ тогтолцоо над руу дайрах болно.
Манайхан дээр алдаа гаргахад VAR-ийн шүүгч турк цай ууж байдаг. Арай инээдтэй байгаа биз дээ? Би турк хүн биш. Туркүүд та нар өөрсдөө энэ асуудлаа сөхөж ярих хэрэгтэй. Хэрвээ би ингээд яриад байвал амыг минь хамхичихна. Тогтолцоогоороо над руу дайрна. Тэгэхээр туркүүд та нар өөрсдөө үүнийгээ илчилж ярьцгаа” хэмээн Моуриньо өгүүлжээ.
Сэтгэгдэл (0)
Сэтгэгдэл бичигдээгүй байна