Европын Аваргуудын лигийн гуравдугаар тойрогт Испанийн “Реал Мадрид” талбайдаа өнгөрсөн улирлын финалд тулсан Германы “Боруссиа Дортмунд”-тай тоглолоо.
Эхний үед зочид 0:2-оор тэргүүлсэн ч гэлээ хоёрдугаар үед талбайн эзэд таван гоол дараалан оруулж, 5:2-оор итгэл төгс хожиж чадав. Энэ тоглолтод бразил тоглогч Винисиус хет-трик хийснээр хэдхэн хоногийн дараа болох “Алтан бөмбөг” гардуулах ёслолын гол хүн байх магадлалаа улам баталгаажууллаа гэж хэвлэлүүд бичиж эхлээд байна.
Харин Мадридын клубын дасгалжуулагч Карло Анчелотти энэхүү хет-трикийг энэ жилийн “Алтан бөмбөг”-т биш дараа жилийнхэд зориулсан гэж хэлжээ.
“Винисиус “Алтан бөмбөг” гардана гэж би бодож байгаа. Гэхдээ өнөөдөр хийсэн зүйлийнхээ төлөө биш шүү. Өнгөрсөн улиралд биднийг Аваргуудын лигт түрүүлэхэд тэр тусалсан. Харин өнөөдрийн энэ хет-трик бол дараа жилийн “Алтан бөмбөг”-ийнх” хэмээн Карло Анчелотти өгүүлсэн байна.
Энэ жилийн “Алтан бөмбөг” гардуулах ёслол аравдугаар сарын 28-нд болно. Хэвлэлүүдийн мэдээлж буйгаар бол тус шагналыг гардах магадлал хамгийн өндөртэй тоглогч нь Винисиус юм.
Сэтгэгдэл (0)
Сэтгэгдэл бичигдээгүй байна