Францын шигшээ болон Испанийн “Реал Мадрид”-ын довтлогч Килиан Мбаппэ амралтын өдрөөрөө Шведийн нийслэл Стокгольмд хэсэг нөхдийнхөө хамт шөнийн цэнгээний газар наргисныхаа дараа хүчингийн хэрэгт хүртэл сэжиглэгдэх болсон.
Шведийн Прокурорын газраас Bank Hotel-д хүчингийн хэрэг гарсныг баталсан ч сэжиглэгдэж буй этгээдийн нэрийг дурдалгүй өнгөрсөн юм. Энэ хэргийн талаар мэдээ түгмэгц “Реал Мадрид”-ын удирдлагууд яаралтай хуралдсан тухай мэдээ гарсан. Тэгвэл Мадридын клубын дасгалжуулагч Карло Анчелоттигоос энэ хэргийн тухай ямар мэдээлэлтэй, ямар бодолтой явааг сэтгүүлч лавлажээ.
“Энд би иймэрхүү тааврын шинжтэй асуултад хариулахаар ирээгүй. Би зөвхөн түүний ажлын талаар л ярих болно. Шигшээ багийн цугларалтын үеэр Мбаппэд түр ч атугай амрах боломж олдсон нь сайн байна. Ер нь түүнд хоёр долоо хоногийн амралт хэрэгтэй гэж тооцож байгаа. Энэ удаагийн амралт маш сайнаар нөлөөлсөн. Шигшээ багийн цугларалтын өмнөхөөсөө эрс сайжирч, сэргэснийг та бүхэн мөдхөн харах болно.
Тийм ээ, бид түүнд амралт өгсөн. Тэгээд ч би янз бүрийн үнэн худал нь үл мэдэгдэх мэдээлэл сонсоод суудаггүй. Мбаппэд энэ мэдээлэл ямар ч нөлөө үзүүлээгүй. Амралт өгсөн, түүнийгээ хаана хэрхэн өнгөрүүлэхээ хүн бүр өөрсдөө шийдэх эрхтэй. Мбаппэ Шведэд очиж амраа юу? Би л гэхэд Лондон руу хоёр хоног явж амарчихаад ирсэн. Явахдаа хэнээс ч зөвшөөрөл аваагүй.
Надад аялал жуулчлалын агентлаг байхгүй учраас багийнхаа хөлбөмбөгчдийг энд тэнд амруулах үйл ажиллагааг зохион байгуулдаггүй л дээ” хэмээн Анчелотти өгүүлжээ.
Өнөө шөнө 03:00 цагаас “Реал Мадрид”-ынхан “Сельта”-гийн талбайд зочлох тоглолттой. Энэ тоглолтод Килиан Мбаппэ оролцоно гэсэн мэдээлэл бий.
Сэтгэгдэл (0)
Сэтгэгдэл бичигдээгүй байна