Саудын Арабын лигийн спортын албаны даргаар ажиллаж буй цагтаа “Челси”-д байсан Майкл Эменало ноднин зун Мохамед Салах яагаад өндөр цалинтай саналаас татгалзсан талаар өөрийн өнцгөөс тайлбарлажээ.
2023 оны зун Мохамед Салахыг авахаар Саудын Арабын “Аль Иттихад” клуб 100 гаруй сая паунд төлөхөд бэлэн байсан юм. Гэвч “Ливерпүүл” ч, хөлбөмбөгч ч өөрөө энэ саналыг хүлээн аваагүй.
“Саудын Арабын лигт Мо ойрын хугацаанд очих уу гэдгийг тэр өөрөө л шийднэ. Манай лигийн клубүүд түүнийг авахаар хөөцөлдөж, өндөр цалинтай санал тавьж байсан нь бол үнэний ортой. Үнэхээр тийм явдал болсон.
Гэхдээ эхлээд клуб нь тоглогчоо зарах сонирхолтой байх хэрэгтэй. Мөн хөлбөмбөгч өөрөө явмаар байх хэрэгтэй. Энэ хоёр хүчин зүйл нийлж байж наймаа бүтнэ.
Тэр тохиолдолд бол “Ливерпүүл” гол тоглогчоо зарахыг хүсээгүй. Мо ч өөрөө бууриа сэлгэхэд бэлэн биш байсан байх. Яагаад гэхээр түүнд Премьер лигт дуусгаагүй ажил байна гэж бодсон болов уу” хэмээн Эменало өгүүлжээ.
Мо Салахын гэрээ ирэх зун дуусгавар болно. Тэрбээр энэ улирлын эхэнд ярилцлага өгөхдөө "Гэрээний маань сүүлчийн жил болохоор юу ч бодолгүй, ирээдүйн талаар санаагаа чилээлгүй бүх анхаарлаа төвлөрүүлээд, тоглолтоосоо таашаал мэдрэхийг л хүсч байна" хэмээн өгүүлсэн билээ.
Сэтгэгдэл (0)
Сэтгэгдэл бичигдээгүй байна