ОЛОН УЛСЫН МАТЕМАТИКИЙН ОЛИМПИАДЫГ 2029 ОНД МОНГОЛ УЛСАД ЗОХИОН БАЙГУУЛАХ ХҮСЭЛТ ХҮРГҮҮЛНЭ

Боловсролын сайд математик, биологийн олон улсын олимпиадад амжилттай оролцсон сурагчдыг хүлээн авлаа.

Математикийн олимпиадад дэлхийн 108 улсын 600 гаруй сурагчид өрсөлдсөнөөс Монгол Улсын багийн 6 сурагч бүгд медаль хүртэж, багийн дүнгээр 16 дугаар байрт шалгарсан юм.

Биологийн олимпиадад дэлхийн 80 улсаас 300 гаруй сурагчид өрсөлдөж, Монгол Улсын багийн 4 сурагчаас  2 нь хүрэл медаль хүртсэн. Олимпиадын даалгавар онолын болон практик хэсгээс бүрдсэн байна. Практик дадлагын тоног, төхөөрөмжийн хангамж сайжруулахад онцгой анхаарах шаардлагатай байгааг онцлов.

Олимпиадад амжилт гаргасан сурагчид сэтгэл зүйгээ сайн хянаж чадсанаар амжилт гаргахад онцгой нөлөөлсөн гэх сэтгэгдлүүд нийтлэг дурдав.

П.Наранбаяр сайд Монгол Улсынхаа нэрийг дэлхийд өндөрт өргөж, амжилт гаргасан сурагчдадаа халуун баяр хүргэж, бахархаж буйгаа илэрхийлээд сурагчдыг мөрөөдлөө нээлттэй илэрхийлж, тэмүүлж явбал мөрөөдөл нь зорилго, зорилго нь амжилт болдгийг захив. Цаашид олон улсын олимпиадад оролцогчдыг бодлогоор тууштай дэмжихээ илэрхийлж, биологийн лабораторийн сургалтыг дэмжихээ амлалаа.

Боловсролын яамнаас албан ёсоор “Олон улсын математикийн олимпиадын хороо”-нд 2029 оны олон улсын математикийн олимпиадыг Монгол Улсад зохион байгуулах хүсэлт хүргүүлэхээ мэдэгдэв. Мөн биологийн олон улсын олимпиадыг Монгол Улсад зохион байгуулах боломжийг эрэлхийлэхээ мэдэгджээ.