Харвардын Анагаахын Их Сургуулийн Зүүн өмнөд Азийн бүсийн орнуудад зориулсан “Эрүүл мэндийн салбар дахь манлайлал” cэдэвт 1 жилийн сургалтын хөтөлбөрийг Монгол Улсаас нийт 20 эмч, мэргэжилтнүүд амжилттай төгсөөд ирсэн байна.
Эрүүл мэндийн яамнаас залуу боловсон хүчнийг дэмжих зорилгоор 2022 онд салбарын хэмжээнд 100 манлайлагч залууг бэлдэх санаачилгааг гаргаж, хөтөлбөрийг эхлүүлжээ. Харвардын их сургуулиас Зүүн Өмнөд Азийн бүсийн орнуудад зориулсан “Эрүүл мэндийн салбар дахь манлайлал” cэдэвт нэг жилийн сургалтын хөтөлбөрт сонгон шалгаруулалт зарласан бөгөөд үүнд эхний ээлжийн 20 эмч, мэргэжилтнүүд хөтөлбөрөө амжилттай төгссөн нь энэ юм. Хөтөлбөрт хамрагдаад ирсэн хүмүүс цаашид бусад эмч, мэргэжилтнүүддээ юу сурсан, мэдсэнээ заах аж. Дараагийн удаагийн сонгон шалгаруулалт ирэх 7 дугаар сард болох бөгөөд хэлний мэдлэг сайн байх, эрүүл мэндийн салбарт таваас дээш жил ажилласан байх зэрэг шалгуурыг тавьдаг байна.
Харвардын сургууль нь хөтөлбөрт оролцогчдод зөвхөн анагаахын мэдлэг олгоод зогсохгүй бизнесийн сургууль, нийтийн эрүүл мэндийн сургуулиудаас дэлхийн хэмжээнд үнэлэгдсэн профессоруудаар хичээл заалгажээ. Тухайлбал, суралцагчид эрүүл мэндийн систем, системийн манлайлал, глобал манлайлал, гэрээ хэлцэл, чанар аюулгүй байдал, санхүү, бүртгэлийн тогтолцоо зэрэг мэдлэгийг багтаасан 60 орчим сэдвээр номын дуу сонссон байна. Уг хөтөлбөрт Монгол Улсын эрүүл мэндийн салбарын эмч, мэргэжилтнүүдийг хамруулахад НҮБ-ын Хүүхдийн сангаас сургалтын төлбөр болон бусад санхүүжилтийг гаргажээ.
Хувь хүний хөгжлийг дээшлүүлэх, менежментийн ур чадварыг эзэмшүүлэх, эрүүл мэндийн тусламж, үйлчилгээний талаарх цогц мэдлэгийг олгох энэхүү хөтөлбөрийн хүрээнд 5 жилийн хугацаанд Монгол Улсын эрүүл мэндийн салбарын 100 эмч, мэргэжилтэн суралцана.
Сэтгэгдэл (0)
Сэтгэгдэл бичигдээгүй байна