БНХАУ-ын хамгийн олон үзэгчтэй “Супер тархи” шоу нэвтрүүлэгт Монголын Оюун Ухааны Академийн ахлах багш, Олон улсын их мастер Ө.Сэнгэсамдан оролцож, ялалт байгуулжээ.
Түүний өрсөлдөгч нь тус шоунд 11 удаа оролцож ялалт байгуулсан, Бүх Хятадын гурван удаагийн улсын аварга Жан Шинрон, 2023 оны дэлхийн аварга Хуан Жин Яао нарыг ялсан Гуо Фэйрон байсан юм.
Ө.Сэнгэсамдан 13 минут 45:22, Гуо Фэйрон 20 минут 25:22 гэсэн хугацаанд даалгаврыг амжилттай гүйцэтгэсэн бөгөөд илүү хурдан гүйцэтгэсэн үзүүлэлтээр манай тамирчин ялжээ. Ө.Сэнгэсамдан нь сүүлийн 7 жил тэмцээн уралдаанд оролцоогүй, жаахан эмээж байсан ч бэлтгэлээ сайн хийж, сэргээж, сэтгэл зүйгээ бүрэн удирдаж чадсанаар ийм амжилтад хүрсэн байна.
Дашрамд дурдахад манай тамирчид “Супер тархи” шоу нэвтрүүлэгт гурван удаа оролцож байнга ялалт байгуулжээ. Тухайлбал, өмнө нь 2016 онд Э.Энхмөнх, 2023 онд Н.Мөнхшүр, Н.Энхшүр нар ялалт байгуулсан билээ.
Сэтгэгдэл (0)
Сэтгэгдэл бичигдээгүй байна