Боловсролын сайд П.Наранбаяр анхны тушаалаараа хичээлийн жилийн бүтцийг баталсан бөгөөд сургуулиудад даруй хүргүүлэх аж.
Хичээлийн шинэ жилийн бүтцийг эрт өгснөөр сургуулиуд бүтэн жилийнхээ тогтмол ажлын төлөвлөгөөг боловсруулан, эцэг эх, сурагчдад эртхэн мэдээлэх боломжтой болно. Үүний үр дүнд гэр бүлийн амралт, аялал, эцэг эхийн ажлын төлөвлөлтийг эртхэн хийх боломжтой болно гэж үзэж байгаа аж. Мөн хугацаа тулгасан, гэнэтийн цочроосон шийдвэр гаргахгүй байхыг анхаарч ажиллах гэнэ.
Энэ хичээлийн жилийн төлөвлөлтийн нэг онцлог нь бие даалтыг оруулж ирсэн явдал аж. Бие даалтын хугацаанд музей, театр үзэх, 6 настнуудыг нүд, шүд, зүрх судасны оношилгоо, гамшгийн сургалтад хамруулах зэрэг ажлыг зохион байгуулах гэнэ. Хичээлийн жилийн 9 дэх буюу аравдугаар сарын сүүлийн 7 хоногт нийт сурагчид, 20 дахь долоо хоногт хөдөө орон нутгийн сурагчид, 21 дэх долоо хоногт нийслэлийн сурагчид бие даалттай байх аж. Мөн хөдөө орон нутгийн сурагчид өвлийн буюу 12-1 дүгээр сарын амралтаар нийслэлийнхнээс нэг долоо хоног богино амарч, хаврын буюу 4 дүгээр сарын амралтаар нэг долоо хоног урт амрахаар зохицуулсан байна.
Сэтгэгдэл (0)
Сэтгэгдэл бичигдээгүй байна