Оросын Пермь хотын оршин суугч нэгэн эмэгтэй 9 настай хүүгээ өөрийн гараар хөнөөгөөд, чемоданд хийж, шөнийн гудамжаар чирж явсаар хогийн саванд хаяж одсон бичлэг олныг цочроосон юм.
Эмэгтэйг удалгүй олж илрүүлэн, өнгөрсөн долоодугаар сарын 15-нд шүүхэд дууджээ. Гэм буруугийн шүүх хурлаар эмэгтэйг есдүгээр сар хүртэл шоронд хорихоор болж, намар хэргийг нь эцэслэн шийдэхээр тогтсон байна. Түүнд 20 хүртэл жилийн ял оноох бололтой.
Оросын сошиал ертөнц болон хэвлэлүүдээр шөнийн гудамжаар чемодан чирж яваа эмэгтэйн дүрс бичлэг, гэрэл зургууд тарж, таньж мэдэх хүн байвал цагдаад хандахыг сануулж байсан юм.
Эмэгтэйн хогийн саванд хаясан чемоданыг гэр оронгүй нэгэн олж, дотроо засах юм хайх гэтэл хүүхдийн цогцостой нүүр тулжээ. Тэр даруй цагдаад мэдэгдсэн байна. Цагдаа нар цогцсыг олсноос хойш долоон цагийн дараагаар хүүгийн хэн болохыг тогтоожээ. Мөн шөнийн турш хүүгийн цогцсыг чемодантай чирж явсан намхавтар нуруутай шаргал үстэй эмэгтэй түүний ээж болохыг ч тогтоожээ. Эмэгтэйг Ирина Шатова гэнэ. 34 настай. Чемоданд түүний төрсөн хүү байж.
Цагдаа нар эмэгтэйн гэрт орж, нэгжлэг хийхдээ өдрийн тэмдэглэл олов. Тэрхүү өдрийн тэмдэглэлээс эмэгтэйг хаана байж болохыг таамаглан мэджээ. Ингээд ердөө нэг хоногийн дараагаар “Жемчужина” зочид буудлын дээвэр дээрээс баривчилсан байна. Эмэгтэй амиа хорлох завдсан ч өндөр дээрээс үсрэхээс эцсийн мөчид айсны зэрэгцээ мөн өндөр настай аав, ээжийгээ асар их өрөнд оруулж үлдээж чадаагүй бололтой. Их өрөнд орсон эмэгтэйд хүүгээ хөнөөх ямар шаардлага байсан юм бол? гэх асуулт гарч ирнэ.
Ирина Шатова ч өөрөө энэ талаар тодорхой хариулж чадахааргүй сэтгэлийн цохилт, гутралд орсон гэнэ. Тэрбээр өдрийн тэмдэглэлийнхээ сүүлийн хоёр хоногт бичсэн хуудсаа урж хаясан байх бөгөөд харин түүнээс өмнөх өдрүүдийн тэмдэглэлдээ хүүгээ өөрөөсөө салгаж бичилгүй үргэлж бид, бид гэж яг нэг хүн адил тэмдэглэснийг сэтгэл судлаачид онцолсон байна. Өөрөөр хэлбэл, эмэгтэйн хувьд хүү нь өөрөө мэт, нэг биетэй хүмүүс шиг байсан бололтой. Хүү нь сургуульд явдаггүй, гэртээ ганцаараа үлдэж чаддаггүй, өвөө, эмээтэй нь ч үлдээдэггүй. Зөвхөн хоёулаа байхыг хүсдэг байсан аж. Ирина Шатова хүүгээ эхэлж хөнөөчихөөд, амиа хорлохоор шийдсэнийг нь тэмдэглэл ч, болсон үйл явдал ч нотолно.
Харин юунаас болов гэвэл өр. Их хэмжээний өр. Шатова өөрийгөө 3 сая рублийн өртэй гэж цагдаад мэдүүлсэн ч хэрэг дээрээ 50 сая рубль байж болзошгүй байгаа гэнэ. Нөхөр нь их хэмжээний өрөнд ормогцоо эхнэр, хүүхдээ хаян, АНУ руу зугтан гарчээ.
Их өртэй үлдсэн эмэгтэй гутарч мөн өдөр бүр өр нэхсэн хүмүүс ирж, айлган сүрдүүлж, тэвчихийн аргагүй байдалд оруулсан бололтой. Ирина Шатова автомашины худалдаа эрхлэн сардаа 100 мянган рублийн орлого олдог ч өрөнд 98 мянгыг нь өгдөг байж. Нөхрийнхөө их өрийг дарахын тулд хөрөнгийн биржид ажилд орж, тодорхой тооны үйлчлүүлэгчтэй болсон ч мөн л бүтэлгүйтжээ.
Ингээд гарцгүй байдалд орсон гэж үзсэн эмэгтэй хүүгээ боомилж хөнөөгөөд, нэмж хутгалаад, чемоданд цогцсыг нь хийн гэрээсээ холдуулж хаясан байна. Харин өөрөө түрүүн өгүүлсэнчлэн амиа хорлохоор зочид буудлын дээвэр дээр гарчээ. Түүнийг цагдаа, хүчнийхэн баривчлахад огт гайхсан, сандарсан шинжгүй байжээ.
“Гарцгүй байдалд орж, аргаа барсандаа хийсэн хэрэг гэж дүгнэж болохоор байна. Түүнд өөр зам үлдээгүй бололтой” хэмээн мөрдөн байцаагч өгүүлжээ.
Сэтгэгдэл (0)
Сэтгэгдэл бичигдээгүй байна