АНУ-ын Ерөнхийлөгч асан, эдүгээ дахин төрийн жолоог атгахаар нэр дэвшээд буй Дональд Трампыг Пенсильвани мужийн Батлер хэмээх жижиг хотод уулзалтаа эхлэх үед буудаж, чихийг нь шархдуулсан халдлага гарсан.
Тэгвэл Трамп руу гал нээсэн этгээдийг хэдэн цагийн дараагаар хэн болохыг нь тогтоожээ. Биед нь ямар нэгэн бичиг баримт байгаагүй тул ДНК-гийн шинжилгээ яаралтай авч, хэн гэдгийг нь тогтооход Батлер хотын төвөөс цаг орчмын зайд амьдардаг 20 настай Томас Мэтью Крукс хэмээх залуу байжээ.
Трампын уулзалтаа хийх газраас 100 орчим метрийн зайд орших дээвэр дээр Крукс авиран гараад мөлхсөөр үзэгдэх орчинд хүрч, тэндээ 3-4 минут орчим амьсгаагаа дарж, тайвширсныхаа дараагаар гал нээсэн гэж мэргэжилтнүүд дүгнэсэн байна. Тэрээр гурван удаа буудсан бөгөөд нэг сум нь Трампын баруун чихийг оносон бол өөр нэг сум нь Трампын ард сууж байсан иргэнийг онож, хөнөөсөн юм. Мөн хоёр иргэн шархджээ.
Томас Крукс аллага үйлдэхдээ Ютүбийн Demolition Ranch хэмээх сувгийн лого бүхий саарал өнгийн футболка өмссөн байсан гэнэ. Энэ суваг нь олон дагагчтай бөгөөд галт зэвсэг танилцуулдаг, хэрхэн хэрэглэхийг зааж өгдөг юм. Крукс Трамп руу AR-15 хагас автомат винтовкоор буудсан аж. Энэ буу нь АНУ-д хоморголон аллага үйлдэгчдийг гол зэвсэг гэгддэг.
Томас Крукс нь орчин үеийн залуусын нэг хэрнээ фэйсбүүк, инстаграм зэрэг олон нийтийн сүлжээнд өөрийн гэсэн хаяггүй нь сонирхолтой байгаа гэнэ. Харин ихэвчлэн цахим тоглоом сонирхогчдын хоорондоо харилцахдаа хэрэглэдэг Discord-ийг ашигладаг нь тодорхой болжээ. Одоо түүний Discord-ийн хаягийн нууц үгийг тайлж, доторхи мэдээлэл, чатыг хянаж үзэхээр ажиллаж байгаа юм байна.
Томас Крукс ямар сэдлийн улмаас Дональд Трамп руу гал нээсэн нь одоо хүртэл тодорхойгүй хэвээр. Гэвч түүнийг Бүгд Найрамдах намын гишүүнчлэлтэй дэмжигч байсан гэх баримт олдсон бололтой.
Томас Круксыг Трамп руу гурван удаа буудсны дараагаар мэргэн буучид олж илрүүлэн буудан хөнөөсөн юм.
Сэтгэгдэл (0)
Сэтгэгдэл бичигдээгүй байна