АНУ-ын Ерөнхийлөгчийн сонгуульд нэр дэвшигч Дональд Трампын Пенсильвани дахь уулзалтын үеэр халдлага болж, баруун чихийг нь буудаж шархдуулсан байна.
Дональд Трампын амь нас аюулгүй байдалд байгаа талаар албан ёсоор мэдэгдсэн бөгөөд харин түүн рүү буудсан этгээдийг хөнөөжээ. Ямар сэдлийн улмаас Трамп руу буудсан нь одоогоор тогтоогдоогүй байна. Халдлагын улмаас уулзалтад очсон нэгэн иргэн амиа алджээ.
АНУ-ын Ерөнхийлөгч Жо Байден болсон явдлыг “байж болшгүй” хэмээн тэмдэглэсэн ч халдлага гэж тодорхойлохоос зайлсхийсэн байна. 1981 онд АНУ-ын Ерөнхийлөгч Рональд Рейганы амийг хөнөөхөөр буудсан явдлаас хойш тус улсад Ерөнхийлөгч болон Ерөнхийлөгчид нэр дэвшигчийн амь насанд халдах гэсэн оролдлого гараагүй байсан юм.
Пенсильвани мужийн Батлер хотын иргэдтэй Дональд Трамп уулзалтаа эхлүүлэхийн өмнөхөн буу дуун гарч, Трамп чихээ даран тонгойход хамгаалалтын албаныхан биеэрээ халхлан хамгаалжээ.
Болсон явдлыг нүдээр харсан гэрчийн өгүүлснээр бол уулзалт болох газрын ойролцоох байшингийн дээвэр дээр зэвсэгтэй этгээд харагдсан гэнэ. Дээвэр дээр сэжигтэй этгээд байгаа талаар цагдаа болон хамгаалалтынханд мэдэгдсэн ч үл тоосон шинжтэй байжээ.
Халдлагын дараагаар Дональд Трамп “Манай улсад ийм явдал гарч байна гэдэгт итгэж чадахгүй нь. Амиа алдсан тэр гэмт этгээдийн талаар одоогоор тодорхой мэдээлэл алга байна. Шүгэлдэх мэт сумны чимээ сонсоод байдал нэг биш болсныг би шууд ойлгосон. Тэр даруй сум миний арьсыг нэвчин орохыг ч мэдэрсэн. Юу болоод байгааг бүрэн ойлгоход цус маань гоожиж байлаа” хэмээн мэдэгджээ.
Хэдийгээр ийм халдлага болсон ч гэлээ энэ сарын 15-18-нд Висконсин мужийн Милуокид товлосон уулзалтаа хойшлуулалгүй хийнэ гэдгээ ч мэдэгдсэн байна.
Сэтгэгдэл (0)
Сэтгэгдэл бичигдээгүй байна