ОХУ-ын нийслэл Москва хотын шүүх өчигдөр тэтгэврийн хөгшдийн байрыг авах зорилгоор хордуулан хөнөөдөг бүлэг этгээдийн хэргийг шүүж, толгойлогчид нь бүх насаар хорих ял оноожээ. Харин бүлэглэлийн бусад гишүүдэд 10-16 жилийн ял ногдуулсан байна.
Сонины зараар гэмт этгээдүүд хажуу өрөө түрээслэх зар тавьсан өндөр настнууд дээр очиж, нийгмийн ажилтнууд, асрагчид болон “жүжиглэж” итгэлийг нь олсныхоо дараагаар хоол хүнсэнд нь хор хийж, амийг нь егүүтгэдэг байжээ. Мэдэгдэж буйгаар бол 8 өндөр настныг энэ замаар хөнөөж, байрыг нь авсан байна. Нас барагсдыг хамтран ажилладаг буяны байгууллагаар дамжуулан хөдөөлүүлдэг тул задлан шинжилгээ хийх боломжийг багасгадаг байж.
Хордсон өндөр настан эсэргүүцэл үзүүлэх юмуу эсвэл богино хугацаанд амьсгал хураахгүй байвал бүрэн нүцгэлээд халуун хөнжлөөр хучихдаа биеийн зарим хэсгийг ил гаргаад цонх онгойлгох юмуу сэнс хүчтэй эргүүлэх замаар хатгалгаа тусгаж, егүүтгэдэг байжээ.
Гэвч нэг удаагийн тохиолдол дээр гэмт этгээдүүд хорныхоо тунг хэтрүүлсний улмаас задлан шинжилгээгээр хордсон нь тогтоогдож, хэрэг нээн шалгаж эхэлсэн байна.Ингээд бүлэг этгээдийг илрүүлж, толгойлогч нь болох Иван Горб хэмээх эрд бүх насаар нь хорих ял, бүлэглэлийн гишүүн Светлана Даниловад 24 жил, Яна Паршина, Ольга Троезубова, Инна Меликян нарын зэрэг эмэгтэйчүүдэд 10-16 жилийн ял оноосон байна. Гэмт этгээдүүд хэргээ огт хүлээгээгүй мөн гэмшээгүй гэнэ.
Сэтгэгдэл (0)
Сэтгэгдэл бичигдээгүй байна