СУРАЛЦАГЧИЙГ ЧАДАМЖИД СУУРИЛСАН ХӨТӨЛБӨРӨӨР ХӨГЖҮҮЛНЭ

Боловсролын хөтөлбөрийн цөм нь дэлхийд өрсөлдөх чадвар эзэмшсэн, түүх, өв соёлоо мэддэг, монгол сэтгэлгээтэй эх оронч иргэнийг бэлтгэх гэж Ерөнхий сайд Л.Оюун-Эрдэнэ өчигдөр /2024.04.09/ Боловсролын үндэсний зөвлөлийн анхдугаар хуралдаан дээр хэлжээ.

Мөн хамгийн чадварлаг хүмүүс багш болдог тогтолцоог бүрдүүлэх хэрэгтэйг онцолсон байна. “2030-2040 онд Шинжлэх ухаан, инновац, технологийн эрин үеийг хамтдаа бий болгох боломжтой. Үүнд бэлтгэхийн тулд боловсролын системээс эхэлнэ гэж тэр мэдэгджээ.

Тус зөвлөлийн дэд дарга, Боловсрол, шинжлэх ухааны сайд Л.Энх-Амгалан“Сургуулийн өмнөх болон ерөнхий боловсролын сургалтын хөтөлбөрийн үзэл баримтлал”-ын талаар танилцуулсан байна.  

Сургуулийн өмнөх болон ерөнхий боловсролын түвшинд монгол суралцагчийг чадамжид суурилсан хөтөлбөрөөр хөгжүүлэх бөгөөд чадамж нь суурь болон ерөнхий чадамжаас бүрдэнэ.

СУУРЬ ЧАДАМЖ:

• Эх хэл, бичиг үсэг;
• Математик;
• Шинжлэх ухаан, технологи;
• Компьютерийн ухаан;
• Англи хэл болон бусад гадаад хэл

ЕРӨНХИЙ ЧАДАМЖ:

• Бүтээлчээр сэтгэх;
• Шүүн тунгаах;
• Суралцахуйд суралцах;
• Харилцах;
• Бие даан болон хамтран ажиллах, амьдрах;
• Сэтгэл хөдлөл, мэдрэмжийг таних, ойлгох, илэрхийлэх, хянах;
• Цахим технологи ашиглах;

• Ёс зүйн хариуцлагатай байх;
• Дэлхийн болон үндэсний өв соёлоо ойлгох, хүндэтгэлтэй хандах, өвлөх, хөгжүүлэх, түгээн дэлгэрүүлэх.

БШУЯ, Боловсролын судалгааны үндэсний хүрээлэн болон Боловсролын үнэлгээний төвөөс 2018-2022 онд хийсэн сургалтын цөм хөтөлбөрийн хэрэгжилтийн судалгаа, оношлох үнэлгээ, сурах бичгийн агуулгын шинжилгээний үр дүнгүүд нь сургалтын хөтөлбөр, сурах бичигт туссан агуулга нь танин мэдэхүйн сэргээн санах ойлголтын түвшинд төвлөрсөн, хэрэглээний болон бүтээлч түвшинд анхаарал хандуулаагүй гэсэн дүгнэлтэд хүрчээ. Сургалтын хөтөлбөрийн шинэчлэл давтамжтай хийгдэж ирсэн ч үзэл санааны хувьд “судлагдахууны агуулга төвтэй сургалтын хөтөлбөр” бүрэн өөрчлөгдөхгүй байгаа талаар дурдлаа. Мөн олон улсын дундажтай харьцуулахад бага боловсролын түвшинд судалж буй хичээлийн тоо ойролцоо, суурь боловсролын түвшинд харьцангуй олон байгаа ажээ.