Монгол Улсын хэмжээнд 37579 багш ажиллаж байгаа, багшийн ил хомсдол буюу сул орон тоо 3000 байгаа нь хувиар тооцвол 7.9 хувь юм. Багшийн далд хомсдол буюу мэргэжлийн бус багш давхар хичээл заах тохиолдол 1.6 хувьтай байна.
Мэргэжлээр үзвэл бага ангийн багш, математик, монгол хэлний багш хамгийн их хомсдолтой буюу эрэлттэй байна. Аймаг, нийслэл тус бүрээр авч үзвэл багшийн хомсдол 2.1-13.5 хувь байгаа гэнэ. Багш хамгийн их хомсдолтой нь Говьсүмбэр аймаг 13.5 хувьтай, Улаанбаатар хотод 10 орчим хувьтай байна гэж БШУ-ны сайд Л.Энх-Амгалан ярив.
Мөн багшийн мэргэшил эзэмшсэн 2 төгсөгч тутмын нэг нь багшийн мэргэжлээрээ ажиллаагүй, төрөөс өндөр оноотой хүүхдүүдийг багш мэргэжил эзэмшихэд тэтгэлэг өгч үнэгүй сургаж байгаа ч тэдний тал нь өөр ажил руу шилжин ажилласан, үр дүнгээ өгөөгүйг дурдсан юм.
БШУЯ-наас “Боловсрол – Их Өгөгдөл (Big Data) – AI (Artifical Intelligence)” сэдэвт Боловсролын салбарын их өгөгдлийн шинжилгээний цахим системийг нээх үеэр дээрх зүйлс яригдав.
Боловсролын салбар сүүлийн жилүүдэд удирдлага, мэдээллийн систем, боловсролын үнэлгээ, цахим үйлчилгээгээр дамжуулан их өгөгдлийг бий болгож чадсан. Ингэснээр багштай холбоотой бүх мэдээлэл, сурагчийн ахиц амжилтыг нэг бүрчлэн харах боломжтой болж байгаа ажээ.
Цаашдаа энэхүү хөгжүүлэлтээр олон төрөлт их өгөгдлийг боловсруулж, хиймэл оюуны арга зүйг өргөн ашиглаж буй бөгөөд боловсролын салбарын шийдвэр гаргах үйл явц, сургалт, тэр дундаа хүүхэд, залуучуудын сурах үйл ажиллагаанд хиймэл оюуны тусламжтай шинжилгээ хийж, хоцрогдолгүй сурах боломжийг бүрдүүлэх гэнэ.
Сэтгэгдэл (0)
Сэтгэгдэл бичигдээгүй байна