С.БЯМБАЦОГТ: НАМРЫН ЧУУЛГАНААР ХӨРӨНГӨ ХУРААХ ХУУЛЬ ЗЭРЭГ ОЛОН ЧУХАЛ ХУУЛЬ ТОГТООМЖИЙГ ХЭЛЭЛЦЭНЭ

УИХ-ын дарга С.Бямбацогт намрын ээлжит чуулганаар хэлэлцэх асуудлын талаар өөрийн цахим хуудастаа ийнхүү бичжээ. 

С.Бямбацогт "Улсын Их Хурлын намрын ээлжит чуулган эхэллээ.

Энэ удаагийн намрын ээлжит чуулган Монгол Улсын эдийн засгийн тогтвортой байдал, ирэх оны хөгжлийн чиглэл, иргэдийн амьжиргааг дэмжих онц хариуцлагатай цаг үед эхэлж байна.

Хэдийгээр гадаад орчин нөхцөл хүндрэлтэй байгаа ч манай улсын эдийн засгийн макро үзүүлэлтүүд өсөлттэй, олон улсын байгууллага, хөрөнгө оруулагчдын хүлээлт эерэг байгаа.

Энэ онд нүүрсний экспорт анх удаа 100 сая тонн, 2027 онд 110 сая тонн болж нийт экспорт 20 тэрбум ам.долларт хүрэх тооцоо гарсны зэрэгцээ гадаад валютын албан нөөц 8.4 тэрбум ам.долларт хүрлээ.

Эдийн засгийн энэхүү өсөлтийг ард иргэдийн бодит орлого, амьжиргааг хамгаалах, ажлын байрыг нэмэгдүүлэх, хувийн хэвшлийг дэмжихэд зарцуулах ёстой.

Энэ намрын чуулганаар:

•  Үнийн өсөлтөөс иргэдийн орлогыг хамгаалж цалин тэтгэвэр нэмэгдүүлэх
•  Эрчим хүч, түлш шатахууны хангамжийн найдвартай байдлыг хангах
•  Ипотекийн зээлийн урт дарааллыг арилгаж хүртээмжийг нэмэгдүүлэх
•  Иргэдээ орон сууцны болон цахим залилангаас сэргийлэх
•  Цахим сүлжээнд хүүхдийн эрхийг хамгаалах
•  Засгийн газраас өргөн мэдүүлэх Хөрөнгө хураах хууль гээд олон чухал хууль тогтоомжийг хэлэлцэн шийдвэрлэх болно." гэсэн байна.