Монголын Оюун ухааны академийг үүсгэн байгуулагч Х.Хатанбаатар "Asian Poker Tour" тэмцээнд оролцож, гурван тэмцээнд шагналт байрт шалгарчээ.
Тэрбээр өөрийн цахим хаягтаа "Asian Poker Tour (APT) буюу спорт покерийн шагналын сан өндөртэй ээлжит тэмцээн эдгээр өдрүүдэд БНСУ-ын Чэжү арал дээр зохион байгуулагдаж нийт 2000 гаруй тамирчин оролцлоо.
Миний хувьд 5 тэмцээнд оролцсон бөгөөд өдөр бүр 12 цаг нийт 5 өдрийн турш 60 цаг сууж өрсөлдөгчийн хөдөлгөөн, нүүрний хувирал, тоглолтын арга барилыг тогтоох, сэтгэл зүйг унших, магадлал буюу тасралтгүй тоо бодох зэргээр тархиа нэлээн ачааллууллаа. Хэдий цом авч чадаагүй ч 3 тэмцээнд шагналт байрт орж мөн Final Table (FT)-д ч суусан бол үндсэн тэмцээн болох Main Event-дээ шагналт байр руу ороход 8 хүн, “NL Hold`em Freezout” тэмцээнд мөн шагналт байр руу ороход 17 хүн дутуу байхад тус тус хасагдлаа. Гэхдээ өөрийгөө энэ том тэмцээнд 100% амжилттай оролцлоо гэж дүгнэж байна.
Покерийг спорт талаас нь хөгжүүлэхийг хичээж байгаа Монголын Покер Спортын Холбооны олон сайхан залуучуудтай танилцлаа. Тэмцээний үеэр бүгд л магадлал бодож, бие биедээ тактик, стратегийн зөвлөгөө өгч мэргэжлийн тамирчдын түвшинд оролцож, амжилт гаргаж байгааг нь хараад бахархаж суулаа.
Нэг маш сайн анзаарсан зүйл маань тэмцээн бүрийн сүүлийн шатанд ихэвчлэн өмнөх тэмцээнүүдэд шагналт байрт орж байсан тамирчид шалгарч байсан нь энэ бол азанд найдсан тоглоом бус мэргэжлийн оюуны спорт гэдэг нь харагдаж байсан юм.
Энэ тэмцээнд оролцох болсон шалтгаан маань өнгөрсөн жил Европ тив буюу Английн оюуны спортын холбооноос зохиосон тэмцээнд 600 хүнээс 2-р байр, Кипрт болсон тэмцээний Side event-д 1-р байрт тус тус орсон нь нөлөөлсөн. Өөрөөр хэлбэл Ази тивдээ өөрийгөө сорьж үзье гэж бодсон юм. Цаашдаа покерийн тэмцээн уралдаанд намайг дахин оролцох эсэхийг хүмүүс сонирхож байж магадгүй. Одоо ганцхан дэлхийн аваргад оролцох дутуу учир энэ жил АНУ-ын Лас вегас хотод WSOP (Дэлхийн аварга шалгаруулах тэмцээн 2024)-т оролцох төлөвлөгөөтэй байна. Үүний дараа дахин ямар ч тэмцээн уралдаанд оролцохгүй.
Эдгээр өдрүүдэд дэмжиж урам өгч байсан та бүхэнд баярлалаа.
Жич: Нийслэлийн шилдэг татвар төлөгч болж байсан хүн чинь монголдоо очоод шагналын мөнгөө тайландаа тусгаж татвараа төлөх болно. 2024.05.04" гэжээ.
Сэтгэгдэл (0)
Сэтгэгдэл бичигдээгүй байна