СИНГАПУР УЛС НОМ УНШСАН ИРГЭДДЭЭ МӨНГӨН УРАМШУУЛАЛ ОЛГОЖ ЭХЭЛЖЭЭ

Сингапур улс иргэдээ өдөрт дор хаяж 15 минут ном уншуулахын тулд мөнгөн урамшуулал олгож эхэлжээ. Энэ нь сошиал орчинд утасныхаа дэлгэцийг тасралтгүй гүйлгэн сөрөг мэдээлэл үздэг буюу “doomscrolling” үзэгдэл нэмэгдэж байгаатай тэмцэх оролдлогын нэг хэсэг гэнэ.

Чинээлэг Сингапур улс энэ сард эхлүүлсэн тоглоомын зарчимд суурилсан буюу “gamification” стратегиараа  иргэдийнхээ төвлөрөх чадвар, шүүмжлэлт сэтгэлгээ болон төсөөлөн бодох чадварыг сайжруулна гэж найдаж байгаа аж.

Хөтөлбөрийн хүрээнд уншигчид оноо цуглуулж, түүнийгээ бага хэмжээний мөнгө болгон авах боломжтой. Иргэд засгийн газрын цахим хуудаст 50 өдрийн уншлагын бүртгэл хийснээр 1 сингапур доллар буюу ойролцоогоор 80 америк цент авах юм. 15 минут буюу түүнээс удаан үргэлжилсэн нэг удаагийн уншлагад 20 виртуал зоос өгнө. Харин 1 сингапур доллар авахын тулд 1,000 зоос цуглуулах шаардлагатай. Өдөрт зөвхөн нэг удаагийн уншлагыг тооцно.

Сингапурын Үндэсний номын сангийн зөвлөлийн тэргүүн Мелисса Тамын хэлснээр удаан хугацаанд тогтвортой үргэлжлэх унших дадлыг бага багаар, биелүүлэхэд хялбар алхмуудаар бий болгодог байна.

Тэрээр The Straits Times сонинд “Бид асар их хэмжээний контент, мэдээллээр хүрээлэгдсэн ертөнцөд амьдарч байна. Бид хэдхэн хормын дотор хэдэн зуун гарчиг гүйлгэн харж, видео үзэж, эсвэл бараг бүх зүйлийн талаар товч мэдээлэл авч чадна.

Дадал зуршил гэдэг бага боловч тогтмол хийдэг үйлдлүүдээс бий болдог. Тиймээс бид маш энгийн зорилгоос эхэлж байна. Өдөрт ердөө 15 минут унш. Автобусанд явж байхдаа, унтахынхаа өмнө эсвэл өдрийн хоолныхоо үеэр ч уншиж болно” гэжээ.

Сингапурын засгийн газар мөн сошиалын мэдээллийн залуу хүмүүст учруулах хор нөлөөг нь багасгах арга замуудыг судалж байгаа бөгөөд үүнд сошиалыг ашиглах өдөр тутмын хугацааны хязгаар тогтоох хувилбар ч багтаж байна.

Саяхан хийсэн нэгэн судалгаагаар залуучуудад сошиалын мэдээллээс учирч буй хамгийн түгээмэл хор уршгийн тоонд донтолт болон doomscrolling оржээ.

Сингапурын засгийн газар иргэдийнхээ зан үйлд нөлөөлөхийн тулд санхүүгийн урамшуулал ашиглах нь гайхал төрүүлэм зүйл биш юм. Өмнө хэрэгжүүлсэн эрүүл мэндийг дэмжих хөтөлбөрүүдийн хүрээнд алхсан хүмүүст супермаркетын эрхийн бичиг, мөн өдөр тутмын алхалтын зорилтоо биелүүлсэн хүмүүст шагнал олгож байсан байна.

Тус улсын Засгийн газар иргэдийн унших дадалд санаа зовниж байгаа ч Сингапурын 15 настай сурагчид 2025 оны Олон улсын сурагчдын үнэлгээний хөтөлбөрийн (PISA) унших чадварын дэлхийн жагсаалтыг тэргүүлж, Хятад болон Тайванийн сурагчдаас өндөр үзүүлэлттэй гарчээ.