ДЭЛХИЙН ЗАХ ЗЭЭЛД АГААРЫН ХӨЛГИЙН ТҮЛШНИЙ ҮНЭ ӨССӨН ХЭВЭЭР БАЙНА

 • Jet A-1 түлшний үнэ:149.40 ам.доллар/баррель

 • IATA-ийн 2026 оны төсөөлөл:152 ам.доллар/баррель

• Түлшний зардал: агаарын тээврийн компанийн нийт зардлын 25–30%

 • Гол нөлөөлөгч хүчин зүйлс: геополитик, газрын тосны зах зээл, аяллын эрэлт, нийлүүлэлтийн эрсдэл

Олон улсын агаарын тээврийн салбар 2026 онд зорчигчдын урсгал нэмэгдэж, нислэгийн сүлжээ тэлж байгаа ч үйл ажиллагааны зардлын хамгийн том дарамтын нэг болох агаарын хөлгийн түлшний үнийн шаталсан өсөлттэй нүүр тулсаар байна.

Олон улсын агаарын тээвэрлэгчдийн холбоо (IATA)-ны Jet Fuel Monitor-ын мэдээллээр 2026 оны долоодугаар сарын байдлаар дэлхийн зах зээлд Jet A-1 төрлийн түлшний дундаж үнэ нэг баррель нь 149.40 ам.долларт хүрээд байна. Энэ нь  өмнөх долоо хоногоос 17.6 хувиар өссөн үзүүлэлт юм.

Олон улсын агаарын тээвэрлэгчдийн холбоо(IATA)-ноос  энэ оны дундаж үнийг “152 ам.доллар орчим байна” гэж төсөөлж байгаа нь өнгөрсөн жилийн дундажтай харьцуулахад  өндөр үзүүлэлт гэж үзэж болно.

Салбарын шинжээчдийн үзэж буйгаар агаарын хөлгийн үнийн өсөлтөд Ойрхи Дорнодын геополитикийн нөхцөл байдал, дэлхийн газрын тосны зах зээлийн савлагаа, аялал жуулчлалын улирал эхэлсэнтэй холбоотой эрэлт, нефть боловсруулах үйлдвэрийн хүчин чадлын хязгаар зэрэг олон хүчин зүйл нөлөөлж байна. Агаарын хөлгийн түлш нь олон улсын агаарын тээврийн компаниудын хамгийн өндөр хувьсах зардал бөгөөд нийт үйл ажиллагааны зардлын дөрөвний нэгээс гуравны нэгийг бүрдүүлэх нь түгээмэл байдаг. Иймээс түлшний үнийн өөрчлөлт нь ашигт ажиллагаа, тасалбарын үнийн бодлого, нислэгийн төлөвлөлт, зардлын удирдлагад шууд нөлөөлдөг.

Ийм нөхцөлд дэлхийн агаарын тээврийн компаниуд шатахууны хэрэглээг бууруулах, түлшний үр ашигтай нислэгийн ажиллагааг нэвтрүүлэх, нисэх буудлууд дахь газрын үйлчилгээг оновчтой зохион байгуулах, нисэх багийн ажиллагааг датад суурилан сайжруулах зэрэг олон чиглэлд анхаарч байна. Дэлхийн зах зээлийн савлагаа өндөр байгаа үед тогтвортой, найдвартай үйлчилгээ үзүүлэх нь үндэсний агаарын тээвэрлэгчдийн өмнө тулгарч буй хамгийн чухал зорилтын нэг  юм. Иймд дэлхийн зах зээлийн нөхцөл хэрхэн өөрчлөгдөхөөс үл хамааран агаарын тээврийн салбарын тогтвортой хөгжлийн үндэс нь аюулгүй ажиллагаа, үр ашигтай менежмент, зардлын сахилга бат, технологийн шинэчлэл байх болно гэж  IATA  гишүүн орнууддаа анхааруулжээ.

Эх сурвалж: BBC