Үндэсний статистикийн хорооны дарга Б.Батдаваа өөрийн цахим хаягтаа нэгэн сонирхолтой гэж хэлж болох мэдээлэл оруулжээ.
Б.Батдаваа "Эрэгтэй, эмэгтэй хүний тоо хэдэн настайд тэнцүү болж байна вэ?
1. Эрэгтэй хүүхэд байгалиасаа илүү олон төрдөг. Тухайлбал, дэлхийд дунджаар 100 эмэгтэй хүүхэд төрөх тутамд 105-106 эрэгтэй хүүхэд төрөх буюу эрэгтэй хүүхэд эмэгтэй хүүхдээс 5- 6 хувиар олон төрдөг байна.
2. Энэ нь эрэгтэй хүний эндэгдэл их байдаг учир байгалиасаа илүү тооны эрэгтэй хүүхэд төрдөг болсон гэж зарим онол үздэг (Evolutionary Compensation буюу тэнцвэржүүлэх онол).
3. Манай улсын хувьд төрөх үеийн хүйсийн харьцаа 2025 онд 107 буюу эрэгтэй хүүхэд 7хувиар олон тоогоор төрсөн байна.
4. Улмаар эрэгтэйчүүдийн нас баралтаас шалтгаалж Монголд 33 нас гэхэд эрэгтэй, эмэгтэй хүний хүйсийн харьцаа тэнцэж, түүнээс хойш насанд эмэгтэйчүүдийн тоо илүү болдог байна. Өөрөөр хэлбэл 33 нас хүртэл эрэгтэйчүүдийн тоо эмэгтэйгээсээ олон байдаг гэсэн үг.
5. Харин эрэгтэй хүүхэд төрүүлэхийг илүүд үздэг зарим улсуудад (Хятад, Энэтхэг гэх мэт) хүйсийн харьцаа тэнцвэржих нас илүү хожуу буюу 60 наснаас хойш байдаг бол өндөр хөгжилтэй орнуудад 45-55 нас байдаг байна. Өндөр хөгжилтэй орнуудын хувьд эрэгтэйчүүдийн нас баралт бага, дундаж наслалт өндөр учраас хүйсийн харьцаа тэнцвэржих нас илүү хойно байдаг." гэсэн байна.
Сэтгэгдэл (0)
Сэтгэгдэл бичигдээгүй байна