УИХ-ын гишүүн Ч.Лодойсамбуу Ерөнхийлөгч У.Хүрэлсүхийг өргөн барьсан УИХ-ын гишүүдийг эгүүлэн татах хуулиа буцаан татахыг хүсэж, өөрийн цахим хаягтаа бичжээ.
Ч.Лодойсамбуу "Монгол Улсын Ерөнхийлөгч Khurelsukh Ukhnaa улсынхаа тусгаар тогтнолыг бүх талаар батжуулахын төлөө олон үр дүнтэй ажил хийсэн. Ц.Элбэгдорж Ерөнхийлөгчөөс хойш түүний үед л манай улсын гадаад харилцаа эргээд үлэмж сэргэсэн. Үүнтэй хэн ч маргахгүй.
Гэтэл Улсын их хурлын гишүүдийг хэмжих боломжгүй ёс зүйн гомдлоор эгүүлэн татдаг болгох хууль өргөн барьж УИХ-аар батлуулах гэж хүчилсэнээр өнөөдрийг хүртэл тусгаар тогтнолынхоо төлөө хийсэн ажил, гаргасан амжилт бүхнээ баллуурдах гэж байна. Маш том алдаа гаргаж байна. Үгэнд ороогүй, өр рүү нь өшиглөсөн дүү нараа шийтгэх гэхдээ улсынхаа тусгаар тогтнолыг урах алхам хийж байна.
Монголчууд албан тушаалаа амин хувийн эрх ашигтаа хэрэглэж итгэл эвдсэн авлигач, хулгайч нарын эрх мэдлийг хурааж авахыг, хууль бүгдэд ижил тэгш үйлчилдэг байхыг л хүсч шаардаж байгаа. Гэвч бидний энэ хүсэлд Ерөнхийлөгчийн өргөн барьсан хууль хамаагүй гэдгийг бүгдээрээ ойлгох хэрэгтэй. Одоо бидний тойрч хэлэлцээд байгаа энэ хуулийн төсөл бол цаашид УИХ дахь олонх нь цөөнхөөсөө таалагдаагүй хэнийг ч “Ёс зүйн зөрчил” нэрээр амыг нь барих, эс бол эгүүлэн татаад байх боломжийг үүсгэх хууль. “Ерөнхийлөгч өөртөө эрх мэдэл нэмэх гээгүй” гэж тайлбарлаж байна билээ. Үнэн ч байх. Бид ч тэгэж бодохгүй байна.
Гол нь цаашид АН, МАН аль нь ч олонх болдог бай ашиглах, “ашиглуулах”, тусгаар улсын парламентыг дураараа онгичиж хүчгүй болгох ийм хуулийг батлуулж үлдээж хэрхэвч болохгүй ээ л гэж байгаа юм. Хүссэн хүнээ “Ёс зүйн зөрчил гаргасаан” гээд гаргаж шидээд эхэлвэл Монголыг Монголчууд бид өөрсдөө удирдахаа болино. Монголчууд Монгол төрөө төлөөллөөрөө дамжуулж барьдаг бидний ардчилал, эрх чөлөө, тусгаар тогтнол ганхах биш бүрэн устана.
Тиймээс Монгол улсын Ерөнхийлөгч Ухнаагийн Хүрэлсүх таныг аль нэг намын бус үндэсний эв нэгдлийн бэлгэ тэмдэг, эрх чөлөөт бүх ард түмнээсээ сонгогдсон Ерөнхийлөгчийн хувиар Монгол Улсынхаа бүрэн эрх, тусгаар тогтнол, эрх чөлөөний төлөө өргөн барьсан хуулиа буцаан татахыг тантай л ижил улсынхаа тусгаар тогтнол, үндэснийхээ эрх чөлөөнд чинхүү санаа чилээдэг, өргөсөн тангарагтаа бат сууж яваа залуу парламентчийн хувьд хичээнгүйлэн хүсэж байна." гэсэн байна.
Сэтгэгдэл (0)
Сэтгэгдэл бичигдээгүй байна